पुणे : ग्राहकांना अधिक सुलभ, जलद आणि दर्जेदार टपाल सेवा उपलब्ध करून देण्याच्या उद्देशाने पुणे टपाल विभागाने ‘पार्सल आपल्या दारी’ या नव्या सुविधेची सुरुवात केली आहे. या उपक्रमाचा शुभारंभ पुणे विभागाच्या पोस्टमास्तर जनरल प्रीती अग्रवाल आणि टपाल सेवेचे संचालक अभिजित बनसोडे यांच्या उपस्थितीत बुधवारी करण्यात आला. या सुविधेमुळे आता किरकोळ ग्राहकांना पार्सल पाठविण्यासाठी टपाल कार्यालयात जाण्याची आवश्यकता राहणार नाही. ग्राहकांच्या मागणीनुसार टपाल विभागाचे कर्मचारी थेट ग्राहकांच्या घरातून, कार्यालयातून किंवा व्यावसायिक आस्थापनातून पार्सल स्वीकारतील. त्यानंतर त्या पार्सलची नोंदणी करून ते देशातील कोणत्याही भागात सुरक्षित आणि विश्वासार्ह पद्धतीने पाठविण्यात येईल. या उपक्रमामुळे नागरिकांचा वेळ, प्रवासाचा खर्च आणि श्रम मोठ्या प्रमाणात वाचणार असून पार्सल पाठविण्याची प्रक्रिया अधिक सुलभ आणि सोयीस्कर होणार आहे. पोस्टमास्तर जनरल प्रीती अग्रवाल यांनी सांगितले की, टपाल विभाग नेहमीच ग्राहकाभिमुख सेवा देण्यासाठी कटिबद्ध असून बदलत्या काळातील गरजा लक्षात घेऊन आधुनिक सुविधा उपलब्ध करून देण्यावर भर दिला जात आहे. ‘पार्सल आपल्या दारी’ ही सेवा म्हणजे टपाल सेवा थेट नागरिकांच्या दारापर्यंत पोहोचविण्याच्या दिशेने उचललेले महत्त्वाचे पाऊल असल्याचे त्यांनी नमूद केले. या सुविधेमुळे पार्सल पाठविण्याची संपूर्ण प्रक्रिया अधिक जलद, सुलभ आणि विश्वासार्ह होईल, असा विश्वासही त्यांनी व्यक्त केला.
टपाल सेवेचे संचालक अभिजित बनसोडे यांनी सांगितले की, ही सुविधा विशेषतः किरकोळ व्यापारी, लघु उद्योजक, ऑनलाईन विक्रेते, महिला उद्योजक, स्वयंरोजगार करणारे नागरिक तसेच नियमित पार्सल पाठविणाऱ्या ग्राहकांसाठी अत्यंत उपयुक्त ठरणार आहे. ग्राहकाभिमुख कार्यपद्धतीला अधिक बळ देणारा हा उपक्रम असल्याचे त्यांनी स्पष्ट केले. या सेवेचा लाभ घेण्यासाठी पिंपरी-चिंचवड महानगरपालिका आणि पुणे महानगरपालिका हद्दीतील काही भागांतील नागरिकांनी ८४२१३७२३१७ या क्रमांकावर दूरध्वनी किंवा व्हॉट्सॲपद्वारे संपर्क साधावा. या कार्यक्षेत्रात पुणे कॅन्टोन्मेंट, खडकी कॅन्टोन्मेंट, येरवडा, हिंजवडी माहिती तंत्रज्ञान उद्यान, हडपसर, एनआयबीएम, कोंढवा, भोसरी आणि मार्केट यार्ड या भागांचा समावेश आहे. तर लक्ष्मी रस्ता, टिळक रस्ता, डेक्कन, औंध, धनकवडी, नांदेड सिटी आणि कोथरूड परिसरातील नागरिकांनी ७०२८००७२२३ या क्रमांकावर दूरध्वनी किंवा व्हॉट्सॲपद्वारे संपर्क साधून या सुविधेचा लाभ घेता येणार आहे. पुणे टपाल विभागामार्फत सुरू करण्यात आलेली ही ग्राहकाभिमुख सेवा आजपासून शहरातील संबंधित टपाल कार्यालयांद्वारे उपलब्ध करण्यात आली असून अधिकाधिक नागरिकांनी या सुविधेचा लाभ घ्यावा, असे आवाहन टपाल विभागाने केले आहे.
