मुंबई : मुंबई शहर जिल्ह्यातील मतदानाची टक्केवारी वाढावी, यासाठी जिल्हाधिकारी तथा अतिरिक्त जिल्हा निवडणूक अधिकारी संजय यादव यांच्या मार्गदर्शनाखाली सातत्याने प्रयत्न करण्यात येत आहेत. त्याचाच एक भाग म्हणून मुंबईमधील कामाठीपुरा येथील देहविक्री करणाऱ्या महिलांच्या मतदान जनजागृतीसाठी विशेष मोहीम राबवण्यात आली. यावेळी या महिला मतदारांनी शंभर टक्के मतदान करण्याचा संकल्प केला. मतदान जनजागृतीच्या या कार्यक्रमास ‘स्वीप’चे समन्वय अधिकारी विजयकुमार सूर्यवंशी, मुंबादेवी विधानसभा मतदारसंघाचे सहाय्यक निवडणूक निर्णय अधिकारी पल्लवी तभाने, सहायक निवडणूक निर्णय अधिकारी स्मिता सावंत, अपने आप स्वयंसेवी संस्थेच्या कार्यकारी संचालक अभिलाषा रावत, नागपाडा पोलिस ठाण्याचे पोलिस निरीक्षक यशवंत बारवकर, प्रसिद्धीमाध्यम कक्षाच्या समन्वय अधिकारी काशीबाई थोरात आदी उपस्थित होते.
विधानसभा सार्वत्रिक निवडणूक-२०२४ च्या अनुषंगाने आयोजित मतदान जनजागृती उपक्रमात एक जागरूक मतदार म्हणून मोठ्या संख्येने सहभागी झाल्याबद्दल विजयकुमार सूर्यवंशी यांनी उपस्थितांचे आभार मानले. तुम्ही जागरूक झालात, तुमच्या सोबतच्या सगळ्यांना मतदान करण्यास सांगा. आपल्या एक-एक मताचे योगदान महत्त्वाचे आहे. संविधानाने दिलेल्या तुमच्या एका मतानेही लोकशाही अधिक सुदृढ होण्यासाठी मदत होणार आहे, असा विश्वास त्यांनी व्यक्त केला. सहायक निवडणूक निर्णय अधिकारी पल्लवी तभाने यांनी मतदानाचा हक्क बजावणे किती महत्त्वाचे आहे, त्यामुळे काय फरक पडू शकतो, याचे महत्त्व या महिलांना पटवून दिले. मतदान करणे हा आपला हक्क आहे. तुम्ही स्वतः मतदान करा आणि आपल्या परिसरातील महिलांना मतदान करण्यासाठी प्रोत्साहन द्यावे, असे आवाहन त्यांनी या वेळी केले.
