पुणे : बडतर्फ प्रशिक्षणार्थी आयएएस पूजा खेडकरच्या अंतरिम जामीन अर्जावरील दिल्ली उच्च न्यायालयात सुनावणी पुन्हा पुढे ढकलण्यात आली. या खटल्याशी संबंधित वकिलांनी न्यायालयात बाजू मांडण्यासाठी आणखी वेळ मागितला. आता या प्रकरणाची सुनावणी ४ ऑक्टोबर रोजी होणार असून, तोपर्यंत पूजा खेडकरला दिलेला दिलासा कायम असेल. यापूर्वी, ५ सप्टेंबर रोजी झालेल्या सुनावणीत पूजाने न्यायालयाला सांगितले होते की ती एम्समध्ये तिच्या अपंगत्वाची तपासणी करण्यास तयार आहे. ४ सप्टेंबर रोजी दिल्ली पोलिसांनी उच्च न्यायालयाला दिलेल्या स्टेटस रिपोर्टमध्ये म्हटले होते की पूजाने यूपीएससीला सादर केलेल्या दोन अपंगत्व प्रमाणपत्रांपैकी एक बनावट असल्याचा संशय आहे. सुनावणीनंतर न्यायमूर्ती सुब्रमण्यम प्रसाद म्हणाले होते की, पोलिसांनी या प्रकरणाच्या पुढील तपासासाठी १० दिवसांचा वेळ मागितला आहे, त्यामुळे सुनावणी पुढे ढकलण्यात येत आहे. दरम्यान, १९ सप्टेंबर रोजी दिल्ली उच्च न्यायालयाने यूपीएससीने दाखल केलेल्या याचिकेवर नोटीस बजावली आणि पूजाला २६ सप्टेंबरपर्यंत उत्तर दाखल करण्यास सांगितले. यूपीएससीने पूजा खेडकरवर खोटी कागदपत्रे सादर केल्याचा आरोप करत कारवाईची मागणी केली होती.
दिल्ली पोलिसांनी पूजा खेडकर प्रकरणात ४ सप्टेंबर रोजी दिल्ली उच्च न्यायालयात स्थिती अहवाल दाखल केला आणि माहिती दिली की निलंबित प्रशिक्षणार्थी आयएएस पूजा खेडकर हिने दोन अपंगत्व प्रमाणपत्र सादर केले होते, त्यापैकी एक बनावट असल्याचा संशय आहे. दिल्ली पोलिसांनी या स्टेटस रिपोर्टमध्ये म्हटले आहे की, आम्ही यूपीएससीने सादर केलेल्या कागदपत्रांची तपासणी केली. नागरी सेवा परीक्षा- २०२२ आणि २०२३ दरम्यान पूजा खेडकरने दोन अपंगत्व प्रमाणपत्रे (एकाधिक अपंगत्व) सादर केल्याचे उघड झाले, त्यानुसार तिला (पूजा) अहमदनगर, महाराष्ट्राच्या वैद्यकीय प्राधिकरणाने जारी केले. अपंग प्रवर्गातील उमेदवार ९ वेळा परीक्षेला बसू शकतो. सामान्य श्रेणीतून ६ प्रयत्नांना परवानगी आहे. पूजावर खोटे वय देणे, आडनाव बदलणे, पालकांबद्दल चुकीची माहिती देणे, चुकीच्या पद्धतीने आरक्षणाचा लाभ घेणे आणि नागरी सेवा परीक्षा निर्धारित मर्यादेपेक्षा जास्त वेळा दिल्याचा आरोप आहे. CSE-२०२२ मध्ये पूजाला ८४१ वा क्रमांक मिळाला आहे. २०२३ बॅचची आयएएस प्रशिक्षणार्थी पूजा जून २०२४ पासून पुण्यात प्रशिक्षण घेत होती.
