पुणे : महापालिकेच्या मुख्यालयातील वाढती गर्दी आणि सुरक्षाविषयक बाबी लक्षात घेता पिंपरी-चिंचवड महानगरपालिकेने (PCMC) नागरिकांच्या प्रवेशासाठी आधुनिक डिजिटल प्रणाली विकसित करण्याचा निर्णय घेतला आहे. मंत्रालयात राबविण्यात येणाऱ्या पद्धतीप्रमाणेच एक नवीन मोबाईल ॲप तयार करण्यात येत असून, या माध्यमातून नागरिकांना महापालिकेत प्रवेश मिळवण्यासाठी आगाऊ नोंदणी करणे आवश्यक असेल. या निर्णयामुळे अनियंत्रित गर्दीवर नियंत्रण ठेवणे, सुरक्षेची पातळी वाढवणे आणि नागरिकांना नियोजित पद्धतीने सेवा देणे शक्य होणार आहे. प्रशासनाने या उपक्रमाला लवकरच अंतिम स्वरूप देण्याची प्रक्रिया सुरू केली असून, यामुळे महापालिकेच्या कामकाजात अधिक पारदर्शकता आणि शिस्त येईल, असा विश्वास व्यक्त केला जात आहे.
या नव्या प्रणालीअंतर्गत नागरिकांना संबंधित विभागातील अधिकाऱ्यांची भेट घेण्यासाठी ॲपवरूनच वेळ निश्चित करता येणार आहे. नोंदणी करताना नाव, पत्ता, मोबाईल क्रमांक आणि आधार क्रमांक यांसारखी आवश्यक माहिती देणे बंधनकारक असेल. नोंदणी पूर्ण झाल्यानंतर मोबाईलवर ओटीपी येईल आणि त्यानंतर क्यूआर कोड जारी केला जाईल. हा क्यूआर कोड प्रवेशद्वारावर दाखवल्यानंतरच नागरिकांना प्रवेशासाठी पास दिला जाईल. विशेष म्हणजे, ज्या दिवशी अपॉइंटमेंट निश्चित केली आहे, त्याच दिवशी प्रवेश दिला जाणार आहे. मंत्रालयात सध्या वापरात असलेल्या ‘डीजी प्रवेश’ (Digi Pravesh) प्रणालीप्रमाणेच येथेही भविष्यात फेस रेकग्निशनसारख्या अत्याधुनिक तंत्रज्ञानाचा वापर करण्याची शक्यता व्यक्त केली जात आहे. या उपक्रमामुळे सुरक्षा अधिक कडक होण्याबरोबरच नागरिकांना अधिक सुलभ, नियोजनबद्ध आणि वेळेची बचत करणारी सेवा मिळेल, असे प्रशासनाने स्पष्ट केले आहे.
