नवी मुंबई (सुरेश पोटे) : एसटीमधून सवलतीच्या दरात प्रवास करण्यासाठी आवश्यक असलेल्या एनसीएमसी कार्डाच्या वितरणाबाबत परिवहन मंत्री प्रताप सरनाईक यांनी महत्त्वपूर्ण घोषणा केली आहे. राज्यातील ६५ ते ७५ वर्षे वयोगटातील महिला व पुरुषांना एसटी प्रवासात ५० टक्के सवलत दिली जाते, तर ७५ वर्षांवरील नागरिकांना मोफत प्रवासाची सुविधा उपलब्ध आहे. याशिवाय समाजातील इतर घटकांनाही विविध सवलती दिल्या जातात. यापूर्वी ही सुविधा आधार कार्डाच्या माध्यमातून दिली जात होती, मात्र आता एसटी प्रवासासाठी एनसीएमसी कार्ड अनिवार्य करण्यात आले आहे. या योजनेला राज्यभरातून चांगला प्रतिसाद मिळत असला तरी कार्ड मिळवण्यासाठी ज्येष्ठ नागरिकांना मोठ्या प्रमाणावर प्रवास आणि गैरसोयीचा सामना करावा लागत होता. विशेषतः उन्हाळ्यात ज्येष्ठ नागरिकांना होणाऱ्या त्रासाच्या पार्श्वभूमीवर फेस्कॉमने पुढाकार घेत ही सेवा थेट ज्येष्ठ नागरिक संघांच्या कार्यालयात सुरू करण्याचा निर्णय घेतला.
फेस्कॉमचे अध्यक्ष डॉ. अण्णासाहेब टेकाळे यांनी एसटी महामंडळाचे वरिष्ठ अधिकारी आणि परिवहन मंत्र्यांशी चर्चा करून ही सेवा राज्यातील प्रत्येक तालुक्यातील ज्येष्ठ नागरिक संघाच्या कार्यालयातून उपलब्ध करण्यासाठी प्रयत्न केले. त्यानुसार परिवहन मंत्र्यांनी एसटी अधिकाऱ्यांना सकारात्मक सूचना दिल्या. महाराष्ट्र दिनाच्या निमित्ताने नेरुळ येथील ज्येष्ठ नागरिक भवनात एनसीएमसी कार्ड नोंदणी शिबिराचे आयोजन करण्यात आले असून या उपक्रमाला मोठा प्रतिसाद मिळाला. नोंदणी प्रक्रिया पूर्ण झाल्यानंतर एका महिन्याच्या आत कार्ड ज्येष्ठ नागरिकांच्या हातात दिले जाणार असल्याची माहिती आयोजकांनी दिली. या कार्यक्रमाला मुंबई प्रादेशिक विभागाचे अध्यक्ष सुरेश पोटे, ज्येष्ठ नागरिक सामाजिक संस्थेचे अध्यक्ष दि. ना. चापके, विकास साठे तसेच इतर मान्यवर उपस्थित होते. नागपूरमध्येही ही सेवा सुरू करण्यात येणार असल्याची माहिती डॉ. टेकाळे यांनी दिली.
