मुंबई : मुंबई शहरात पार्किंगची समस्या दिवसेंदिवस जटील होत चालली आहे. मुंबईकरांना पार्किंगची सुविधा उपलब्ध करून देण्यासाठी मुंबई महापालिका पार्किंग मोबाईल ॲप आणत आहे. ॲपच्या सॉफ्टवेअर कामासाठी निविदा प्रक्रिया सुरू असून, हार्डवेअर कामांसाठीही काढण्यात आलेल्या निविदांना मात्र प्रतिसाद मिळालेला नाही. सध्या विधानपरिषद निवडणुकांच्या आचारसंहितेचाही अडसर असून त्यानंतरच नव्याने निविदा काढली जाणार असल्याची माहिती मुंबई महापालिकेतील सूत्रांनी दिली. मुंबईत गेल्या काही वर्षांत वाहनांची संख्या वाढतच आहे. त्यामुळे वाहनांचा वेग कमी होणे, वाहतूककोंडी यासारख्या समस्यांना तोंड द्यावे लागते. सध्या मुंबईत वाहनांची संख्या ४३ लाखांहून अधिक झाली आहे. २०११-१२ मध्ये हीच वाहनसंख्या २० लाख २८ हजार ५०० एवढी होती. वाढलेल्या वाहनसंख्येमुळे पार्किंग मिळणे कठीण होत चालले आहे. मेट्रो, विविध विकासकामे आदी कारणांमुळे रस्त्यांवर पार्किंगची जागा कमी होऊ लागली. त्यामुळे महापालिकेनेही पार्किंगवर लक्ष देताना बहुस्तरीय यांत्रिकी वाहनतळांबरोबरच रस्त्यांवरील पार्किंगच्या सुविधेत वाढ करण्याचा निर्णय घेतला आहे.
सध्या मुंबईतील २४ पैकी काही वॉर्डमध्ये शुल्क आकारून पार्किंग सुविधा दिली जाते. याशिवाय मुंबईत महापालिकेच्या १७ विभागांत ३२ ठिकाणी सार्वजनिक बहुमजली आणि भूमिगत पार्किंग उभारण्यात आले आहे. अन्य ठिकाणी कामेही सुरू आहेत. तर ६२ ठिकाणी रस्त्यांवर वाहनतळ आहे. तर मुंबईतील काही भागात पार्किंग आणि नो पार्किंग क्षेत्रही आहे. ॲपच्या सॉफ्टवेअर कामासाठी गेल्या वर्षी निविदा काढण्यात आली. मात्र त्याला प्रतिसाद मिळाला नाही, म्हणून पुन्हा निविदा काढली आहे. जानेवारी २०२४ नंतर हार्डवेअर कामांसाठी निविदा काढली असता त्याकडेही कंत्राटदारांनी पाठ फिरवली. हार्डवेअर कामांसाठी दोन वेळा काढलेल्या निविदांना प्रतिसादच मिळालेला नाही. त्यामुळे आता पुन्हा निविदा काढली जाणार आहे. विधानपरिषद निवडणुकांसाठी आचारसंहिता लागू असल्याने या कामांसाठी पुन्हा निविदा काढलेली नाही. जुलै महिन्यात ही निविदा काढण्यात येणार असल्याचे सूत्रांनी सांगितले. त्यामुळे डिसेंबर अखेरपर्यंत किंवा त्यानंतरच पार्किंग मोबाईल ॲप सेवा मुंबईकरांच्या सेवेत येऊ शकेल, असे बोलले जात आहे. वाहनांच्या एकूण संख्येच्या तुलनेत पार्किंगची उपलब्धता मात्र नाही. नेमके पार्किंग कुठे करावे, असा प्रश्न वाहनचालकांना पडतो. यावर उपाय म्हणून वाहनचालकांना मोबाइलवर पार्किंगच्या जागेची उपलब्धता समजेल, अशी ॲप सेवा विकसित करण्याचा निर्णय मुंबई महापालिकेने घेतला आहे. सरकारी, खासगी कार्यालयांच्या जागेबरोबरच निवासी सोसायट्यांच्या जागेतही वाहनांना पार्किंग उपलब्ध आहे का ते या ॲपद्वारे वाहनचालकांना समजणार आहे. त्यानुसार जवळच उपलब्ध असलेल्या जागेत चालक वाहन पार्किंग करू शकणार आहे. त्याचे दरही निश्चित केले जाणार आहेत. यातून महापालिकेला आणि सोसायट्यांनाही उत्पन्न मिळणार आहे.
