मुंबई : इमारतींबरोबरच आता झोपडपट्ट्यांमध्येही ओला आणि सुका कचरा असे वर्गीकरण केले जाणार आहे. हे वर्गीकरण सहज आणि सोपे व्हावे, यासाठी प्रत्येक झोपडपट्टीत विशिष्ट लोकसंख्येमागे १२० लिटर क्षमतेचे कचऱ्याचे दोन डबे देण्यात येणार आहेत. यासाठी महापालिकेने धोरण तयार केले असून, आयुक्तांच्या मंजुरीनंतर त्याची अंमलबजावणी होणार आहे. मुंबईची लोकसंख्या सुमारे दीड कोटींच्या घरात पोहोचली आहे. यापैकी ६० टक्क्यांहून अधिक नागरिक झोपडपट्ट्यांमध्ये राहतात. काही झोपडपट्ट्यांमध्ये ठिकठिकाणी कचरा टाकलेला आढळून येतो, तर काही झोपडपट्ट्यांमध्ये एकाच ठिकाणी कचरापेट्यांमध्ये कचरा संकलन केले जाते. घरातील ओला आणि सुका अशा दोन्ही प्रकारचा कचरा एकत्र टाकला जात असल्याने, महापालिकेच्या स्थानिक वर्गीकरण केंद्रात त्याचे वर्गीकरण करावे लागते. अनेकदा डम्पिंग ग्राऊंडवरही हा एकत्रित कचरा विल्हेवाट लावण्यासाठी नेला जातो. त्यामुळे कचरा समस्येत भर पडते आहे.
यावर उपाय म्हणून ओला आणि सुका कचरा वेगवेगळा करण्यासाठी शहर व उपनगरांतील ६५ हजार सोसायट्यांमध्ये एक लाख २० हजार कचरा डब्यांचे वाटप करण्याचे काम सुरू आहे. यापाठोपाठ झोपडपट्ट्यांमध्येही डब्यांचे वाटप करण्यात येणार आहे. महापालिकेतर्फे ‘स्वच्छ व सुंदर मुंबई’ अभियान राबवण्यात येत असून याअंतर्गत सन २०३०पर्यंत मुंबईत कचरामुक्तीचे लक्ष्य ठेवण्यात आले आहे. यासाठी कचरा वर्गीकरण करणे गरजेचे आहे. यापूर्वी लोकप्रतिनिधींच्या माध्यमातून कचरा डब्यांचे वाटप करण्यात येत होते. मात्र आता सोसायट्यांनी अर्ज केल्यास, प्रत्येक सोसायटीला कचरा वर्गीकरणासाठी १२० लिटरचे दोन डबे देण्यात येत आहेत, अशी माहिती महापालिकेच्या घनकचरा व्यवस्थापन विभागामार्फत देण्यात आली आहे.
या योजनेत सहभागी होण्यासाठी महापालिकेच्या विभागीय कार्यालयात, तसेच ७०३००७९७७७ या क्रमांकावर अर्ज करणे गरजेचे आहे. अर्ज केल्यानंतर १० दिवसांत दोन डबे देण्यात येतात, अशी माहिती महापालिकेकडून देण्यात आली. मुंबईतील सोसायट्या आणि झोपडपट्ट्यांमधील संस्थांना १२० लिटरचे दोन डबे देण्यात येत आहेत. डबा खराब झाल्यास नवीन डबा देण्यात येईल, तसेच दर दोन वर्षांनी नवीन डबे देण्यात येतील, असे महापालिका प्रशासनाकडून सांगण्यात आले.
