मुंबई : मुंबईतील गणेशोत्सव म्हटलं की लाखो भाविकांचा उत्साह, ढोल-ताशांचा निनाद आणि भक्तीमय वातावरण अशीच ओळख आहे. यंदाही २९ ऑगस्ट रोजी चिंचपोकळीच्या चिंतामणीच्या भव्य आगमन सोहळ्यासाठी मुंबईसह राज्याच्या विविध भागांतून हजारो भाविकांनी मोठ्या संख्येने उपस्थिती लावली होती. परळ येथून सुरू झालेल्या या आगमन मिरवणुकीत ढोल-ताशांचा गजर, गुलालाची उधळण आणि ‘चिंचपोकळीच्या चिंतामणीचा विजय असो’ अशा जयघोषात संपूर्ण परिसर भक्तिमय झाला होता. भाविकांची प्रचंड गर्दी लक्षात घेऊन मुंबई पोलिसांनीही मोठा बंदोबस्त तैनात केला होता. मिरवणूक मार्गावर पोलीस, वाहतूक पोलीस आणि इतर सुरक्षा यंत्रणा सतर्क होत्या. मात्र, या कडेकोट बंदोबस्तालाही चोरट्यांनी चकवा दिल्याचे समोर आले आहे. आगमन सोहळा संपल्यानंतर अनेक भाविकांना आपले मोबाईल फोन हरवल्याचे लक्षात आले. सुरुवातीला गर्दीत मोबाईल पडला असावा, असा अनेकांचा समज होता. मात्र, एकामागून एक अनेक तक्रारी समोर येऊ लागल्यानंतर हा प्रकार चोरीचा असल्याचे स्पष्ट झाले. संबंधित नागरिकांनी तातडीने काळाचौकी पोलीस ठाण्यात धाव घेत तक्रारी दाखल केल्या. पोलिसांकडे नोंदविण्यात आलेल्या तक्रारीनुसार, तब्बल ११ जणांचे मोबाईल फोन चोरीला गेले असून त्यांची एकूण किंमत सुमारे ८ लाख २७ हजार रुपये इतकी आहे. प्राथमिक माहितीनुसार, हे सर्व मोबाईल २९ ऑगस्ट रोजी दुपारी ३ ते रात्री ८ वाजण्याच्या दरम्यान चोरीला गेले. या कालावधीत मिरवणुकीच्या मार्गावर मोठी गर्दी होती. याच गर्दीचा फायदा घेत अज्ञात चोरट्यांनी नागरिकांच्या खिशातील आणि बॅगमधील मोबाईल लंपास केल्याचा संशय व्यक्त केला जात आहे.
चोरीला गेलेल्या मोबाईलमध्ये अनेक महागड्या स्मार्टफोनचा समावेश असून त्यात आयफोन १७ प्रो, आयफोन १७ प्रो मॅक्स, आयफोन १६, आयफोन १५ प्लस, विवो एक्स३०० प्रो, मोटोरोला एज ६० प्रो तसेच रेडमी कंपनीचे काही मोबाईल फोन असल्याची माहिती समोर आली आहे. या सर्व मोबाईलची एकत्रित किंमत लाखोंमध्ये असल्याने या घटनेने भाविकांमध्ये मोठी चिंता निर्माण झाली आहे. काळाचौकी पोलिसांनी सर्व तक्रारींची नोंद घेत अज्ञात चोरट्यांविरोधात गुन्हा दाखल केला असून तपासाची चक्रे वेगाने फिरवली आहेत. घटनास्थळ परिसरातील सीसीटीव्ही फुटेज, तांत्रिक पुरावे आणि उपलब्ध माहितीच्या आधारे संशयितांचा शोध घेण्याचे काम सुरू आहे. गर्दीच्या ठिकाणी सक्रिय असलेल्या व्यावसायिक मोबाईल चोरांच्या टोळीचा या प्रकारामागे हात असण्याची शक्यता पोलिसांकडून तपासली जात आहे. आगामी काही दिवसांत मुंबईत गणेशोत्सवाच्या निमित्ताने विविध सार्वजनिक मंडळांमध्ये दर्शनासाठी लाखो भाविकांची गर्दी होणार आहे. त्यामुळे अशा घटनांची पुनरावृत्ती होऊ नये यासाठी पोलीस यंत्रणा अधिक सतर्क झाली असून गर्दीच्या ठिकाणी विशेष पथके तैनात करण्यासह सीसीटीव्हीद्वारे अधिक प्रभावी देखरेख ठेवण्याची तयारी सुरू आहे. तसेच नागरिकांनी गर्दीत मोबाईल, पाकीट आणि इतर मौल्यवान वस्तू सुरक्षित ठेवाव्यात, संशयास्पद हालचाली दिसल्यास तातडीने पोलिसांना माहिती द्यावी आणि शक्य असल्यास मोबाईलच्या सुरक्षा सुविधा सक्रिय ठेवाव्यात, असे आवाहन पोलिसांकडून करण्यात आले आहे. गणेशोत्सवासारख्या मोठ्या धार्मिक उत्सवांमध्ये भक्तीभावाबरोबरच वैयक्तिक सुरक्षेची काळजी घेणेही तितकेच महत्त्वाचे असल्याचे या घटनेतून पुन्हा एकदा अधोरेखित झाले आहे.
