मुंबई : महाराष्ट्रात एसआयआर-२०२६ प्रक्रियेदरम्यान सुमारे दोन कोटी सात लाख मतदारांची नावे वगळण्यात आल्याची चर्चा सुरू असताना मुख्य निवडणूक अधिकारी एस. चोकलिंगम यांनी महत्त्वाचे स्पष्टीकरण दिले आहे. ही अंतिम मतदार यादी नसून सध्या मसुदा यादी प्रसिद्ध करण्यात आली आहे. त्यामुळे दोन कोटी मतदार कायमचे बाद झाले आहेत, असे समजू नये, असे त्यांनी स्पष्ट केले. चोकलिंगम यांनी प्रत्येक मतदाराने मसुदा मतदार यादी तपासण्याचे आवाहन केले. केवळ राज्यातील एकूण आकडेवारीकडे न पाहता आपले नाव यादीत आहे का आणि त्यातील तपशील अचूक आहेत का, हे तपासावे. नाव नसल्यास समावेशासाठी अर्ज करावा, तर काही चूक असल्यास दुरुस्तीची मागणी करावी. नाव वगळण्याबाबत आक्षेप असल्यास फॉर्म ६ भरून नाव समाविष्ट करण्यासाठी अर्ज करता येईल. मसुद्यानंतर दावे आणि हरकतींची प्रक्रिया होणार असल्याने ही अंतिम यादी नसल्याचे त्यांनी सांगितले.
चोकलिंगम यांच्या माहितीनुसार, पडताळणीदरम्यान संपर्क होऊ न शकलेल्या मतदारांमध्ये ७५.५२ लाख अनुपस्थित किंवा भेट न झालेले, ७६.८० लाख कायमस्वरूपी स्थलांतरित, ३४.८१ लाख मृत, १७.६३ लाख अन्यत्र नोंदणीकृत किंवा दुबार आणि २.२३ लाख इतर श्रेणीत आहेत. विविध जिल्हाधिकाऱ्यांच्या संकेतस्थळांवर मसुदा मतदार याद्या प्रसिद्ध केल्या जात असून, राजकीय पक्षांच्या बूथस्तरीय प्रतिनिधींनाही त्या उपलब्ध करून दिल्या जात आहेत. मतदार पडताळणीसाठी बूथ लेव्हल अधिकाऱ्याने (BLO) किमान एकदा मतदाराची भेट घेणे अपेक्षित होते. व्यक्ती भेटली नाही तर तीन वेळा भेटीचे प्रयत्न करण्यात आले. त्यानंतर उपलब्ध माहितीनुसार मतदारांचे वर्गीकरण करण्यात आले. अनुपस्थित व्यक्ती स्थलांतरित असू शकते किंवा अन्य कारणाने उपलब्ध नसू शकते. कायमस्वरूपी स्थलांतरितांच्या बाबतीत पत्त्यावरून प्रत्यक्ष स्थलांतर झाल्याची माहिती, तर मृत व्यक्तींच्या बाबतीत अधिकृत नोंदी किंवा कुटुंबीयांकडून मिळालेल्या माहितीकडे पाहण्यात आले. दरम्यान, काही पात्र मतदार चुकीच्या श्रेणीत वर्गीकृत झाले असण्याची शक्यता नाकारता येत नसल्याचे चोकलिंगम यांनी सांगितले. विशेषतः शहरांमध्ये अनेक नागरिक रात्री उशिरा घरी परतत असल्याने त्यांची भेट घेण्यात अडचणी येतात. त्यामुळे ३१ ऑगस्टची यादी केवळ मसुदा असून, चुका दुरुस्त करण्याची संधी उपलब्ध आहे. प्रत्येक मतदाराने स्वतःचे नाव आणि तपशील तपासून आवश्यक असल्यास दुरुस्ती करावी, असे आवाहन त्यांनी केले.
