मुंबई : मुंबई उच्च न्यायालयाच्या कठोर निरीक्षणांनंतर आणि अन्न व औषध प्रशासनाच्या (एफडीए) कारवाईच्या पार्श्वभूमीवर मंत्रालयातील उपाहारगृहात (कँटीन) तातडीने स्वच्छता आणि अन्नसुरक्षा नियमांची अंमलबजावणी करण्यात आल्याचे दिसून आले. कालपर्यंत अस्वच्छता आणि नियमांच्या उल्लंघनाबाबत चर्चेत असलेल्या कँटीनमध्ये आता कर्मचाऱ्यांच्या हातात हँडग्लोव्हज, डोक्यावर कॅप्स, तसेच सर्व खाद्यपदार्थ व्यवस्थित झाकून ठेवण्यासाठी संरक्षक जाळ्यांचा वापर करण्यात येत असल्याचे पाहायला मिळाले. शुक्रवारी सकाळी उच्च न्यायालयातील सुनावणीनंतर एफडीएचे अधिकारी आणि सरकारी वकिलांच्या पथकाने मंत्रालयातील कँटीनची पाहणी केली. त्यानंतर अन्नसुरक्षेच्या दृष्टीने आवश्यक उपाययोजना तातडीने लागू करण्यात आल्या असून, स्वच्छतेच्या नियमांचे काटेकोर पालन करण्यास सुरुवात करण्यात आली आहे. या अचानक झालेल्या बदलामुळे मंत्रालयातील अधिकारी, कर्मचारी आणि सामान्य नागरिकांमध्येही चर्चेला उधाण आले आहे. न्यायालयाच्या हस्तक्षेपानंतरच स्वच्छतेकडे गांभीर्याने लक्ष दिले जात असल्याची चर्चा विविध स्तरांवर सुरू आहे.
या प्रकरणाच्या सुनावणीदरम्यान एफडीएने न्यायालयात मंत्रालयातील कँटीनची तपासणी करून ते ९८ टक्के स्वच्छ असल्याचा दावा केला होता. तपासणीत कोणताही कीटक किंवा कीटकजन्य पदार्थ आढळला नसल्याचेही एफडीएच्या वकिलांनी न्यायालयाला सांगितले. मात्र, या दाव्यावर मुंबई उच्च न्यायालयाने तीव्र नाराजी व्यक्त करत, “मोठमोठ्या पंचतारांकित हॉटेल्समध्येही एखादी माशी किंवा झुरळ आढळते, मग मंत्रालयाचे कँटीन इतके निर्दोष कसे असू शकते?” असा खोचक सवाल उपस्थित केला. तसेच एवढ्या मोठ्या उपाहारगृहात एकही कीटक आढळला नाही, हा दावा कितपत विश्वासार्ह आहे, यावरही न्यायालयाने प्रश्नचिन्ह उपस्थित केले. एफडीएने न्यायालयात केवळ छायाचित्रे सादर केल्याबद्दलही न्यायालयाने असमाधान व्यक्त केले. “तपासणीचे फक्त फोटोच का सादर केले? संपूर्ण तपासणीचा व्हिडिओ का तयार करण्यात आला नाही?” अशी विचारणा करत न्यायालयाने अधिक पारदर्शक पुरावे सादर करण्याचे निर्देश दिले. त्यानुसार मंत्रालयातील कँटीनच्या तपासणीचा व्हिडिओ ३१ जुलै रोजी दुपारी ३ वाजेपर्यंत न्यायालयात सादर करण्याचे आदेश देण्यात आले आहेत. या प्रकरणामुळे मंत्रालयातील अन्नसुरक्षा, स्वच्छता आणि एफडीएच्या तपासणी प्रक्रियेबाबत नव्याने प्रश्न उपस्थित झाले असून, पुढील सुनावणीकडे सर्वांचे लक्ष लागले आहे.
