मुंबई : मुंबई मेट्रो रेल कॉर्पोरेशन (एमएमआरसी) ने ‘आरे – कफ परेड’ मेट्रो ३ मार्गिकेवर प्रवास करणाऱ्या प्रवाशांसाठी महत्त्वाचा दिलासादायक निर्णय घेतला आहे. या मार्गिकेवरील ४५ आणि ६० फेऱ्यांच्या मासिक ट्रिप पासची वैधता ३० दिवसांवरून ४५ दिवसांपर्यंत वाढवण्यात आली आहे. त्यामुळे प्रवाशांना आता पूर्वीपेक्षा अधिक कालावधीत आपल्या फेऱ्यांचा वापर करता येणार आहे. तसेच १ दिवस आणि ३ दिवसांच्या पासच्या दरातही अनुक्रमे ₹७० आणि ₹१०० इतकी कपात करण्यात आली आहे. त्यामुळे मेट्रो ३ वरील प्रवास अधिक परवडणारा ठरणार आहे. ऑक्टोबर २०२५ पासून ३३.५ किमी लांबीची आरे ते कफ परेड ही संपूर्ण भुयारी मेट्रो सेवा सुरू झाल्यानंतर या मार्गिकेला प्रवाशांचा चांगला प्रतिसाद मिळत आहे. सध्या दररोज सुमारे १.७५ लाख प्रवासी या मार्गिकेवरून प्रवास करत असून, प्रवाशांची संख्या आणखी वाढावी यासाठी एमएमआरसीकडून विविध सुविधा उपलब्ध करून दिल्या जात आहेत.
यापूर्वी १ दिवसाच्या पाससाठी ₹२८० शुल्क आकारले जात होते. मात्र आता हा पास ₹२१० मध्ये उपलब्ध होणार आहे. त्याचप्रमाणे ३ दिवसांच्या पासची किंमत ₹७०० वरून ₹६०० करण्यात आली आहे. या पासद्वारे पर्यटक आणि प्रवासी ठरावीक कालावधीत अमर्यादित प्रवास करू शकतात. दुसरीकडे, ४५ आणि ६० फेऱ्यांचे मासिक ट्रिप पास पूर्वी केवळ ३० दिवसांसाठी वैध होते, मात्र आता त्यांची वैधता ४५ दिवसांपर्यंत वाढवण्यात आली आहे. त्यामुळे प्रवाशांना घाईगडबडीत फेऱ्या पूर्ण करण्याची गरज राहणार नाही आणि अधिक सोयीस्कर पद्धतीने पासचा वापर करता येईल. गणेशोत्सवाच्या पार्श्वभूमीवर घेतलेल्या या निर्णयामुळे नियमित प्रवासी, पर्यटक तसेच कार्यालयीन प्रवास करणाऱ्यांना मोठा आर्थिक दिलासा मिळणार असून, मेट्रो ३ मार्गिकेवरील प्रवास अधिक किफायतशीर आणि सुविधाजनक होणार आहे.
