जे’गद्दार’ असतील त्यांना ‘गद्दार’ म्हणायची ताकद माझ्यात गद्दार दिनानिमित्त राष्ट्रीय कार्याध्यक्षा खासदार सुप्रियाताई सुळेंची घोषणा

मुंबई  : महाराष्ट्र कभी झुका है, ना कभी झुकेगा’… ‘मोडेन पण वाकणार नाही’ जे ‘गद्दार’ असतील त्यांना ‘गद्दार’ म्हणायची ताकद माझ्यात आहे असे खासदार सुप्रियाताई सुळे यांनी सरकारला ठणकावून सांगितले. आज राष्ट्रवादी काँग्रेस पक्षाच्या आमदारांची बैठक पार पडली. तत्पूर्वी प्रसार माध्यमांसोबत बोलतांना त्यांनी सदर घोषणा केला.
महाराष्ट्रात लोकशाही राहिली आहे का असा सवाल करतानाच रस्त्यावर आंदोलन करायला परवानगी मिळत नसेल तर कितीही किंमत मोजावी लागली तरी आम्ही दडपशाहीच्या विरोधात लढत राहणार असा स्पष्ट इशारा सुप्रियाताई सुळे यांनी माध्यमांशी बोलताना दिला. आम्ही गद्दार दिवस साजरा करत आहोत आणि या कारणासाठी आम्हाला जेलमध्ये टाकणार असाल तर आम्ही जेलमध्ये जायला तयार आहोत असेही खासदार सुप्रियाताई सुळे यांनी सरकारला सुनावले.
शिंदे गटाचे मंत्री शंभूराज देसाई हे बोलायला इतके पक्के आहेत की, त्यांनी कॅमेर्‍यासमोर ‘पन्नास खोके’ तुम्हाला हवेत का अशी ऑफर दिली होती. त्यामुळे नरेंद्र मोदी आणि अमित शहा यांना सांगितले पाहिजे की, तुमच्या सरकारमधील मंत्रीमंडळातील मंत्री भ्रष्टाचाराची ऑफर देत आहेत. ‘न खाऊंगा ना, खाने दुंगा’ या पंतप्रधानांच्या जाहीर वक्तव्याची आठवणही खासदार सुप्रियाताई सुळे यांनी यावेळी करुन दिली. आज टिव्ही आणि वर्तमानपत्रात आलेल्या बातम्या वाचल्या व पाहिल्यानंतर लक्षात आले की, आज २० जून म्हणजे गद्दार दिवस आहे. आजच्या दिवशी महाराष्ट्राच्या राजकारणात ज्या घटना घडल्या त्या घटनेला टिव्हीवर ‘गद्दार दिवस’ म्हणत आहेत असेही त्या म्हणाल्या. माजी मुख्यमंत्री उध्दव ठाकरे यांनी ‘गद्दारी’ केली असे काहीजण म्हणत आहेत तर त्याच उध्दव ठाकरे यांच्या कॅबिनेटमध्ये ते मंत्री होते हे विसरले का? असा टोलाही खासदार सुप्रियाताई सुळे यांनी पत्रकांरानी विचारलेल्या प्रश्नाला उत्तर देताना लगावला.
राष्ट्रीय कार्याध्यक्ष खासदार प्रफुल पटेल, खासदार सुप्रियाताई सुळे, प्रदेशाध्यक्ष जयंतराव पाटील आणि विरोधी पक्षनेते अजितदादा पवार यांच्या उपस्थितीत राष्ट्रवादी काँग्रेस पक्षाच्या आमदारांची बैठक पार पडली.