आठ लाखाचा सोन्याचा मालासह काटई-बदलापूर रस्त्यावर दोन सोनसाखळी चोर अटकेत

पोलिसांनी घटना घडल्याच्या ठिकाणी सीसीटीव्ही चित्रण तपासले. चोरट्यांची ओळख पटविल्यानंतर ते इराणी वस्ती भागातील रहिवासी असल्याचे पोलिसांना समजले. हे चोरटे नवी मुंबईतून तळोजा मार्गे डोंबिवलीत येणार आहेत, अशी माहिती पोलिसांना मिळाली. पोलिसांनी काटई-बदलापूर रस्त्यावरील तळोजा वळण रस्ता येथे निसर्ग हाॅटेलच्या जवळ सापळा लावला. ठरल्या वेळेत आरोपी तेथे दुचाकीवरून येताच पोलिसांनी मुदाम या भागातील रस्त्यावर मालवाहू अवजड वाहने अडवून ठेवली. दुचाकी स्वार या वाहन कोंडीत अडकून ते पळून जाणार नाहीत, असे पोलिसांना वाटले. परंतु आपणास पोलिसांनी घेरले हे समजातच दोन्ही चोरटे रस्त्यावर दुचाकी सोडून पळू लागले. पोलिसांनी त्यांचा पाठलाग करून त्यांना पकडले. त्यांनी डोंबिवली, कल्याण मधील मानपाडा, रामनगर, महात्मा फुले पोलीस ठाणे, विष्णुनगर, कोळसेवाडी पोलीस ठाणे हद्दीत सोनसाखळी चोरीचे गुन्हे केले असल्याची कबुली पोलिसांना दिली. आरोपींकडून आठ लाख ६८ हजाराचा ऐवज जप्त करण्यात आला आहे. वरिष्ठ पोलीस निरीक्षक अशोक होनमाने यांच्या मार्गदर्शनाखाली पोलीस निरीक्षक सुरेश मदने, सुनील तारमळे, अनिवाश वनवे, साहाय्यक पोलीस उपनिरीक्षक भानुदास काटकर यांच्या पथकाने ही अटकेची कारवाई केली.