पुणे : शेअर मार्केटमध्ये गुंतवणूक केल्यास मोठा फायदा होईल, असे आमिष दाखवून दीडशे नागरिकांची २५ कोटी रुपयांची फसवणूक करणाऱ्या सहा जणांच्या टोळीला सायबर पोलिसांनी अटक केली. त्यातील पाच जण चिनी भाषा बोलणाऱ्या विदेशी नागरिकांच्या संपर्कात राहून फसवणुकीतील रक्कम क्रिप्टो आणि यूएसडीटीच्या माध्यमातून पाठवत होते. त्यांच्याकडून हवाला, मनी ट्रान्सफर, इतर मार्गाने पैसे घेत होते.
यश भारत पाटोळे (२५, रा. कोल्हापूर), यासीर अब्दुल माजिद शेख (३४, रा. उंड्री, पुणे), मोहम्मद सुलतान अहमद मोहम्मद जेहरेद्दून (३०, रा. पटणा, बिहार), माझ अफसर मिर्झा (२४, रा. स्वारगेट, पुणे), हुसेन ताहीर सोहेल शेख (२३, रा. संभाजीनगर) आणि बाबूराव शिवकिरण मेरू (४१, रा. हडपसर, पुणे) अशी अटक केलेल्या आरोपींची नावे आहेत. सायबर पोलीस ठाण्याचे पोलीस निरीक्षक रविकिरण नाळे यांनी याबाबत माहिती दिली. तक्रारदाराला समाज माध्यमावर शेअर मार्केट संदर्भात एक जाहिरात दिसली. शेअर मार्केटमध्ये गुंतवणुकीवर दररोज १० ते २० टक्के नफा मिळेल असे सांगितले. लिंकवर क्लिक केल्यानंतर तक्रारदाराला समूहात समाविष्ट केले. ८९ लाख ३५ हजार ३०५ रुपये गुंतवणूक करण्यास सांगितले. गुंतवणूक केली असता त्यांना गुंतवलेल्या रकमेवर आठ कोटी ७१ लाख रुपये नफा झाल्याचे दाखवले. तक्रारदाराने ती रक्कम काढण्याचा प्रयत्न केला असता त्यांना आणखी पैशांची मागणी करण्यात आली. गुंतवलेली रक्कम न देता त्यांची फसवणूक करण्यात आली. याबाबत सायबर पोलीस ठाण्यात गुन्हा दाखल करण्यात आला होता.
आरोपींनी एका बँक खात्यावर ३३ लाख ८६ हजार रुपये वळवून घेतल्याचे निदर्शनास आले. त्यानुसार पोलिसांनी बँक खात्याची माहिती घेऊन यशची ओळख पटवली. त्याला कोंढवा येथून ताब्यात घेतले. त्याचे साथीदार कोंढवा येथील एका हॉटेलमध्ये बसून चिनी भाषा बोलणाऱ्या विदेशी नागरिकांशी संपर्क साधत सायबर गुन्हे करत असल्याचे निदर्शनास आले. त्यानुसार सायबर पोलिसांनी आणखी पाच जणांना अटक केली. त्यांच्याकडून नऊ मोबाइल संच, १५ सिमकार्ड, चार सीसीटीव्ही, आठ धनादेश पुस्तक, २० एटीएम कार्ड, एक लॅपटॉप, एक मेमरी कार्ड, एक पारपत्र आणि १३ हजार ५५० रुपये रोख रक्कम जप्त करण्यात आल्याचे पोलिसांनी सांगितले.
