ठाणे : अन्न व औषध प्रशासन (एफडीए) भेसळयुक्त अन्नपदार्थ तसेच बेकायदेशीररित्या गुटखा आणि पानमसाल्याची विक्री करणाऱ्यांविरोधात सातत्याने कठोर कारवाई करत आहे. या मोहिमेचा भाग म्हणून ठाणे जिल्ह्यातील मुंब्रा येथे एफडीएच्या पथकाने डायघर पोलिसांच्या मदतीने धडक कारवाई करत प्रतिबंधित पानमसाला आणि सुगंधित तंबाखूचा साठा जप्त केला. या प्रकरणी दुकान मालक आसिफ आरिफ शेख (वय ४८) याला ताब्यात घेण्यात आले आहे. मुंब्र्यातील एका मोठ्या गृहसंकुलातील ‘फेमस पान शॉप’ या दुकानात महाराष्ट्रात बंदी असलेल्या तंबाखूजन्य पदार्थांची विक्री होत असल्याची माहिती एफडीएला मिळाली होती. त्यानुसार १७ जून रोजी पथकाने छापा टाकला. तपासणीदरम्यान दुकानात मोठ्या प्रमाणात प्रतिबंधित पदार्थांचा साठा आढळून आल्याने संबंधित दुकानदाराविरोधात कारवाई करण्यात आली.
या कारवाईत कैश गोल्ड पान मसाला, व्हीसी सुगंधित तंबाखू, मुसाफिर पान मसाला आणि एम-४ सुगंधित तंबाखू यांचा साठा जप्त करण्यात आला. अन्न सुरक्षा विभागाच्या माहितीनुसार, सार्वजनिक आरोग्याच्या दृष्टीने महाराष्ट्रात पानमसाला, सुगंधित तंबाखू आणि इतर तंबाखूजन्य पदार्थांच्या उत्पादन, साठवणूक, विक्री आणि वितरणावर बंदी लागू आहे. या आदेशाचे उल्लंघन केल्याप्रकरणी संबंधित दुकानदाराविरोधात डायघर पोलीस ठाण्यात गुन्हा दाखल करण्यात आला आहे. दरम्यान, अशा सातत्यपूर्ण कारवायांमुळे गुटखा आणि पानमसाल्याची बेकायदेशीर विक्री करणाऱ्यांमध्ये भीतीचे वातावरण निर्माण झाले आहे. अनेक पानटपरी चालकांनी कारवाईच्या धास्तीने प्रतिबंधित पदार्थांची विक्री बंद केल्याचे सांगितले जात आहे. या मोहिमेमुळे तरुणांमध्ये वाढणारे व्यसन रोखण्यास मदत होत असून नागरिकांनीही प्रशासनाच्या या कारवाईचे स्वागत केले आहे.
