भाईंदर : मिरा रोड येथील पेणकर पाडा परिसरात पावसाचे पाणी घरात शिरण्याच्या कारणावरून झालेल्या कौटुंबिक वादादरम्यान एका व्यक्तीने हातात कोयता घेतल्याची घटना घडली. या घटनेचा व्हिडिओ समाजमाध्यमांवर मोठ्या प्रमाणात व्हायरल झाल्यानंतर परिसरात भीतीचे वातावरण निर्माण झाले. व्हिडिओमध्ये एका महिलेवर कोयत्याने हल्ला झाल्याचा दावा सोशल मीडियावर करण्यात आला होता. मात्र, प्राथमिक चौकशीनंतर या घटनेचे स्वरूप वेगळे असल्याचे पोलिसांनी स्पष्ट केले आहे. काशिमिरा पोलिसांच्या माहितीनुसार, या घटनेतील दोन्ही पक्ष एकाच भावकीतील असून त्यांच्यातील वाद हा कौटुंबिक स्वरूपाचा होता. मुसळधार पावसामुळे एका कुटुंबाकडून घरावर प्लास्टिक टाकण्याचे काम सुरू होते. या कामामुळे शेजारील घरात पावसाचे पाणी जाऊ लागल्याने दोन्ही कुटुंबांमध्ये वाद निर्माण झाला. त्यावेळी प्लास्टिक कापण्यासाठी संबंधित व्यक्तीने हातात कोयता घेतल्याचे पोलिसांनी सांगितले. या घटनेदरम्यान एका महिलेच्या डोक्याला किरकोळ दुखापत झाल्याची माहिती समोर आली असली, तरी पोलिसांनी याला कौटुंबिक वादाचे स्वरूप असल्याचे नमूद केले आहे. घटनेनंतर पोलिसांनी दोन्ही पक्षांची चौकशी केली असता त्यांनी परस्परांतील वाद मिटल्याचे सांगत कोणतीही अधिकृत तक्रार देण्यास नकार दिला.
काशिमिरा पोलीस ठाण्याचे वरिष्ठ पोलीस निरीक्षक राजेंद्र कांबळे यांनी सांगितले की, दोन्ही कुटुंबांनी तक्रार नोंदविण्यास नकार दिल्यामुळे या प्रकरणी कोणताही गुन्हा दाखल करण्यात आलेला नाही. संबंधितांना समज देऊन सोडण्यात आले असून, भविष्यात अशा प्रकारची घटना घडू नये, याबाबतही त्यांना सूचना देण्यात आल्या आहेत. दरम्यान, या घटनेचा व्हिडिओ सोशल मीडियावर वेगाने व्हायरल झाल्यामुळे नागरिकांमध्ये संभ्रमाचे वातावरण निर्माण झाले होते. मिरा रोड परिसरात यापूर्वीही किरकोळ कारणांवरून धारदार शस्त्रांचा वापर झाल्याच्या काही घटना समोर आल्याने नागरिकांनी अशा प्रकारांवर कठोर कारवाई करण्याची मागणी केली आहे. सार्वजनिक ठिकाणी धारदार शस्त्रे हाताळण्याच्या घटनांमुळे कायदा आणि सुव्यवस्थेबाबत चिंता व्यक्त होत असून, अशा प्रकारांना आळा घालण्यासाठी पोलिसांनी अधिक प्रभावी प्रतिबंधात्मक उपाययोजना कराव्यात, अशी अपेक्षा नागरिकांकडून व्यक्त केली जात आहे. मात्र, या प्रकरणात पोलिसांनी स्पष्ट केले आहे की, उपलब्ध माहितीनुसार हा वाद कौटुंबिक स्वरूपाचा असून दोन्ही पक्षांनी तक्रार न दिल्यामुळे सध्या कोणतीही फौजदारी कारवाई करण्यात आलेली नाही.
