नागपूर : इंडिया पोस्टने डाक सेवा २.० ॲप लाँच केले आहे. यामुळे नागरिकांना पोस्टाच्या सेवा स्मार्टफोनवर उपलब्ध झाल्या आहेत. या ॲपद्वारे पार्सल ट्रॅकिंग, स्पीड पोस्ट बुकिंग, पोस्टेज शुल्क कॅल्क्युलेटर, इन्शुरन्स प्रीमियम भरणे आणि तक्रार नोंदवणे यांसारख्या सेवा घरबसल्या मिळताहेत. हे डिजिटल पाऊल टपाल विभागाच्या सेवा वापरणाऱ्यांसाठी महत्त्वाचे ठरणार आहे. काही दिवसांपूर्वीच सुरू झालेल्या या ॲपला चांगला प्रतिसाद मिळत आहे.
विशेषतः दुर्गम भागांतील लोकांना याचा मोठा फायदा होईल, असा विश्वास व्यक्त करण्यात येत आहे. घरबसल्या स्मार्टफोनच्या मदतीने पोस्ट ऑफिसच्या जवळजवळ सर्व सेवा हाताळता येणार आहेत. स्पीड पोस्ट पार्सलची बुकिंग करणे, मनीऑर्डर ट्रॅक करणे, विम्याचे प्रीमियम भरणे किंवा अगदी तक्रार नोंदवणे इत्यादी सर्व काम पोस्ट ऑफिसमध्ये न जाता, रांगेत उभे न राहता करणे शक्य झाले आहे. इंडिया पोस्टच्या आयटी २.० अपग्रेडचा एक भाग म्हणून हे ॲप सुरू करण्यात आले आहे. नागरिकांना विश्वसनीय, पारदर्शक डिजिटल ॲक्सेस देण्यासाठी हे ॲप उपयोगी ठरत आहे. या ॲपमुळे पार्सल, पत्रे, स्पीड पोस्ट, मनीऑर्डरचे कन्साइनमेंट नंबरच्या माध्यमातून ट्रॅकिंग करता येते. देशांतर्गत आणि आंतरराष्ट्रीय पार्सलसाठी लागणारे पोस्टेज शुल्क ॲपमध्ये त्वरित मोजता येते. गूगल प्ले स्टोअर किंवा ॲपल ॲप स्टोअरवरून अधिकृत डाकसेवा ॲप डानलोड करता येतो. ॲपमधून थेट तक्रार किंवा क्वेरी नोंदवता येते. तसेच त्या तक्रारीचे काय झाले याचे ट्रॅकिंग करता येते. त्वरित मदतीसाठी १८००-२६६-६८६८ ही हेल्पलाइन आणि चॅट असिस्टंटदेखील उपलब्ध आहे. तुम्ही भारतात कुठेही असाल तरी अॅपमुळे जीपीएसआधारित नकाशाचा वापर करून जवळचे पोस्ट ऑफिस किंवा इतर सेवा त्वरित शोधता येतात.
