मुंबई : नवी मुंबई येथील कार्यालयात जाणाऱ्या आणि नियमित बस प्रवास करणाऱ्या प्रवाशांच्या सोयीकरिता बेस्ट उपक्रमाद्वारे खारघर ते वांद्रे-कुर्ला संकुलपर्यंत (बीकेसी) नवीन प्रीमियम बससेवा सुरू करण्यात आली आहे. नवी मुंबईसह बेलापूर ते बीकेसी, बेलापूर ते अंधेरी, खारघर ते अंधेरी या तीन मार्गांवर लवकरच बेस्ट बस सुरू करण्यात येणार आहे, अशी घोषणा बेस्ट उपक्रमाने केली आहे. बेस्ट उपक्रमाची प्रीमियम बस सेवा ‘चलो बस’ म्हणूनही ओळखली जाते. यंदाच्या एप्रिल महिन्यात सुरुवात झालेल्या या सेवेला लोकप्रियता मिळाली असून दररोज सात हजार प्रवासी या बससेवेचा वापर करतात.
प्रवाशांच्या मागण्या पूर्ण करण्याकरिता सध्याच्या वाहतूक पर्यायामध्ये सुधारणा करण्याच्या हेतूने नवीन बस मार्ग सुरू करण्याचे योजले आहे. त्यामुळे मुंबई शहराच्या विविध भागांमध्ये सेवा देणाऱ्या प्रीमियम बसच्या संख्येत ६०पर्यंत वाढ झाली आहे. येत्या काही दिवसांत बसचा ताफा १००पर्यंत वाढणार आहे. बेस्ट चलो अॅपद्वारे प्रवासी बसमध्ये निश्चित जागा आरक्षित करू शकतात, प्रवाशांनी आरक्षण केले असेल तरच बस थांबेल. खारघर ते बीकेसी आणि बीकेसी ते खारघर हा मार्ग क्रमांक एस-११४ असून कमाल तिकीट भाडे १७८ रुपये असणार आहे. खारघर ते बीकेसीसाठी पहिली फेरी सकाळी ७ वाजता तर शेवटची फेरी रात्री साडेआठ वाजता असणार आहे. तसंच बीकेसीवरून खारघरसाठी पहिली फेरी पहाटे पाच वाजता तर अंतिम फेरी सायंकाळी साडेसहा वाजता असेल.
