पुणे : महावितरणच्या बंडगार्डन विभागातील कार्यकारी अभियंत्याला दोन लाख रुपयांची लाच घेताना पुणे लाचलुचपत प्रतिबंधक विभागाने रंहेगात पकडले. प्रलंबित असलेल्या ५ फाईलवर कार्यवाही करण्यासाठी तसेच मांजरी येथील नवीन इमारतीसाठी उभारलेल्या डीपीवर वीज भार मंजूर केल्याचा मोबदला म्हणून अभियंत्याने ५ लाख रुपयांची लाचेची मागणी करुन त्यापैकी २ लाख रुपये घेतले आहेत. भाऊसाहेब मच्छिंद्र सावंत (वय ५१) असे या कार्यकारी अभियंताचे नाव आहे. याप्रकरणी वानवडी पोलिसांत गुन्हा नोंद केला आहे. याबाबत एका विद्युत ठेकेदाराने तक्रार केली होती. त्यांनी त्यांच्या ओळखीचे व्यावसायिकांच्या ५ नवीन इमारतीसाठी इलेक्ट्रिक डी पी उभारुन सप्लाय चालू करुन देण्याचे काम घेतले होते. त्यासाठी त्यांनी ५ फाईल तयार करुन मंजुरीसाठी बंडगार्डन येथील महावितरण कार्यालयात दिलेल्या होत्या. तसेच तक्रारदार यांनी मांजरी येथील एका नवीन इमारतीच्या ठिकाणी उभारलेल्या डी पीवर वीज भार मंजूर करुन घेऊन सप्लाय चालू करुन दिला आहे.
दरम्यान, कार्यकारी अभियंता भाऊसाहेब सावंत यांच्याकडे तक्रारदार यांच्यावरील प्रलंबित असलेल्या ५ फाईलवर कार्यवाही करण्यासाठी आणि तक्रारदार यांनी मांजरी येथील नवीन इमारतीसाठी उभारलेल्या डीपीवर वीज भार मंजूर केल्याचा मोबदला म्हणून सावंत याने तक्रारदार यांच्याकडे ५ लाख रुपयांची मागणी केली. याबाबत त्यांनी एसीबीकडे तक्रार केली होती. या तक्रारीची ७, ८, २१ व २२ ऑक्टोंबर रोजी पडताळणी केली. त्यात तक्रारदार यांची कामे करण्यासाठी मोबदला म्हणून ५ लाख रुपयांची लाचेची मागणी केल्याचे निष्पन्न झाले. तक्रारदाराकडे मागितलेल्या ५ लाख रुपयांच्या लाचेपैकी अॅडव्हान्स म्हणून २ लाख रुपये लाच स्वीकारताना एसीबीने महावितरणच्या बंडगार्डन कार्यालयात सापळा कारवाईकरून त्यांना दोन लाख रुपये घेताना रंगेहात पकडले.
