पुणे : राज्यासह देशभरात दिवाळीचा सण मोठ्या उत्साहात साजरा करण्यात येतो, मात्र या दिवसांमध्ये होणाऱ्या आतिषबाजीमुळे हवेची गुणवत्ता मात्र ढासळते. दिवाळीनंतर पुणे आणि मुंबई या शहरांमधील हवेची गुणवत्ता मोठ्या प्रमाणात ढासळल्याचे समोर आले आहे. पुणे शहरातील हडपसर भागात तर हवा धोकादायक पातळीवर पोहचली आहे. यामुळे नागरिकांचे श्वसनाचे आजार बळावण्याचा धोका आहे. दिवाळी निमित्त पुणे शहर आणि परिसरात मोठ्या प्रमाणात फटाके फोडले जातात. याचा थेट परिणाम हवेच्या गुणवत्तेवर होतो. फटक्यांमुळे पुण्यात मोठ्या प्रमाणात हवा प्रदूषण झाले असून अनेक भागात हवेची गुणवत्ता धोकादायक पातळीवर पोहचली आहे.
केंद्रीय प्रदूषण नियंत्रण मंडळाच्या आकडेवारीनुसार हवा गुणवत्ता निर्देशांक पुढीलप्रमाणे :
शिवाजीनगर – २५४
भूमकरनगर – १७४
सावित्रीबाई फुले पुणे विद्यापीठ – २९८
कर्वे रस्ता – २०९
हडपसर २८१
लोहगाव येथील म्हाडा कॉलनी – १५४
हवेची गुणवत्तेचा निर्देशांक जर १ ते १०० पर्यंत असेल तर हवेतील काही प्रदूषणकारी घटक त्रासदायक ठरू शकतात. पण तोच १०१ ते २०० दरम्यान निर्देशांक असल्यास मुले आणि ज्येष्ठांना श्वसनासाठी त्रास होऊ लागतो. २०१ ते ३०० या दरम्यान निर्देशांक असेल तर सर्वांनाच त्याचे गंभीर परिणाम भोगावे लागतात आणि ३०० पेक्षा जास्तअसल्यास आरोग्याच्या गंभीर समस्या निर्माण होऊ शकतात. पुणे, सातारा, अहिल्यानगर, बीड, धाराशिव, लातूर, नांदेड या ७ जिल्ह्यात फक्त ढगाळ वातावरण राहिल असा अंदाज वर्तवला असून राज्यातील उर्वरित २९ जिल्ह्यात केवळ स्वच्छ वातावरण जाणवेल, सध्या महाराष्ट्रात दुपारचे कमाल तापमान सरासरी इतके म्हणजे ३३ डिग्री से. ग्रेड च्या आसपास आहे. तर पहाटेचे किमान तापमान मात्र भाग बदलत सरासरीपेक्षा २ ते ४ डिग्री से. ग्रेड ने अधिक म्हणजे २२ डिग्री से. ग्रेड च्या आसपास आहे. त्यामुळे अजुन ऑक्टोबर हिटचा परिणाम टिकून आहे. मंगळवार दि. ५ नोव्हेंबर पासून निरभ्र आकाशासहित संपूर्ण महाराष्ट्रात हळूहळू थंडीला सुरवात होवू शकते असा अंदाज व्यक्त करण्यात आला आहे.
