नवी दिल्ली : शिवसेना कोणाची? धनुष्यबाण कोणाचा? याबद्दल सर्वोच्च न्यायालयात सुरु असलेल्या सुनावणी प्रकरणात आता नवीन अपडेट समोर आली आहे. शिवसेना पक्ष आणि चिन्हाची सुनावणी सर्वोच्च न्यायालयानं पुन्हा एकदा पुढे ढकलली आहे. या प्रकरणाची सुनावणी उद्या अपेक्षित होती. पण सरन्यायाधीश डी. वाय. चंद्रचूड ब्राझील दौऱ्यावर असल्यानं ही सुनावणी पुढे ढकलण्यात आली आहे. आता या प्रकरणाची सुनावणी जुलैमध्ये होईल. त्यामुळे या प्रकरणात पुन्हा एकदा तारीख पे तारीख सुरु असल्याचं दिसतंय. शिवसेना पक्ष, चिन्हाबद्दल उद्या म्हणजेच १७ मे रोजी सुनावणी होणार होती. पण सरन्यायाधीश चंद्रचूड ब्राझीलमध्ये असल्यानं या प्रकरणाची सुनावणी पुढे ढकलली गेली आहे. १८ मे ते ७ जुलै या कालावधीत न्यायालयाला उन्हाळी सुट्टी आहे. त्यामुळे या प्रकरणाची सुनावणी थेट जुलैमध्ये होईल. १७ जुलैला या प्रकरणात सुनावणी घेतली जाईल.
शिवसेनेत पडलेल्या फुटीनंतर निवडणूक आयोगानं पक्ष आणि चिन्हाबद्दल १७ फेब्रुवारी २०२३ रोजी निर्णय दिला. पक्ष आणि चिन्ह एकनाथ शिंदेंना सोपवण्यात आलं. त्यामुळे उद्धव ठाकरेंना मोठा धक्का बसला. त्यांच्याकडून निवडणूक आयोगाच्या निर्णयाला सर्वोच्च न्यायालयात आव्हान देण्यात आलं. वकील अभिषेक मनु सिंघवी यांनी ठाकरेंच्या वतीनं सर्वोच्च न्यायालयात अपील केलं. शिवसेना पक्ष आणि चिन्ह एकनाथ शिंदेंना देण्यात आलं. तर उद्धव ठाकरेंना मशाल चिन्ह देण्यात आलं. याच चिन्हाच्या आधारे ठाकरेसेना लोकसभेची निवडणूक लढवत आहे. शिवसेना पक्ष, चिन्हाबद्दलची सुनावणी वारंवार पुढे ढकलण्यात येत आहे. १ ऑगस्ट २०२३, २ फेब्रुवारी २०२४, १९ फेब्रुवारी २०२४, १ मार्च २०२४ आणि आता १७ मे २०२४ अशी पाचवेळा ही सुनावणी पुढे ढकलण्यात आली आहे.
