मुंबई : ‘रस्त्यांवर, उघड्यांवर तयार केलेले खाद्यपदार्थ तसेच शिळे अन्न खाणे टाळावे. उन्हाळ्यातील वाढत्या तापमानामुळे खाद्यपदार्थ लवकर खराब होतात. उघड्यावरील व निकृष्ट दर्जाचे पदार्थ खाल्ल्याने अन्न विषबाधेच्या घटना घडतात, ही बाब लक्षात घेता सर्व नागरिकांनी योग्य ती काळजी घ्यावी, मार्गदर्शक सूचनांचे पालन करावे’, असे आवाहन पालिका प्रशासनाकडून करण्यात आले आहे. उन्हाळ्यामुळे वाढलेले तापमान व त्यातून अन्न पदार्थांवर होणारे परिणाम या पार्श्वभूमीवर पालिकेच्या आरोग्य विभागाकडून मुंबईतील नागरिकांना आवाहन करणाऱ्या मार्गदर्शक सूचना जारी करण्यात आल्या आहेत. मुंबईसारख्या धावपळीच्या शहरात काहीवेळा रस्त्यावरील खाद्यपदार्थ स्वस्त किंवा सहजपणे उपलब्ध असल्यामुळे त्याचे सेवन केले जाते. मात्र सार्वजनिक ठिकाणांवर उपलब्ध असणाऱ्या खाद्यपदार्थांबाबत काळजी घेणे आवश्यक आहे, असे पालिकेने स्पष्ट केले आहे.
उघड्यावरील खाद्यपदार्थ का खाऊ नये?
– अनेकदा रस्त्यांवरील/उघड्यांवरील खाद्यपदार्थ निकृष्ट दर्जाचे, बरेचदा शिळे व योग्य पद्धतीने साठवलेले नसतात.
– उन्हाळ्यातील वाढत्या तापमानामुळे खाद्यपदार्थ लवकर खराब होतात.
– खराब/निकृष्ट दर्जाच्या अन्नपदार्थांच्या सेवनामुळे अन्न विषबाधेसारख्या आरोग्याच्या समस्या उद्भवू शकतात.
– बाहेरील व रस्त्यावरील अनधिकृत विक्रेत्यांकडून पेय आणि खाद्यपदार्थ खाण्याचे टाळावे.
– लहान मुले रस्त्यावरील खाद्यपदार्थांचे सेवन करणार नाहीत, याबाबतीत पालकांनी दक्षता घ्यावी.
काय काळजी घ्यावी?
– शक्यतो घरात शिजवलेले, ताज्या अन्नपदार्थांचे सेवन करावे.
– शिजवलेले अन्न झाकून ठेवावे. शिळे अन्न खाणे टाळावे.
– चिकन, मटण व मासे यासारख्या पदार्थांचे सेवन करण्याआधी ते ताजे, स्वच्छ व व्यवस्थित शिजलेले आहेत, याची खात्री करून घ्यावी.
– गर्भवती महिलांनी प्रामुख्याने दुसऱ्या तिमाहीमध्ये वैयक्तिक स्वच्छता व पौष्टिक आहाराकडे विशेष लक्ष द्यावे.
– हिरव्या भाजीपाला आणि फळे यांचे सेवन नेहमी स्वच्छ पाण्याने धुतल्यानंतर करावे.
– प्रसाधनानंतर व स्वयंपाकापूर्वी हात नियमितपणे स्वच्छ धुवावे आणि वैयक्तिक स्वछता पाळावी.
– उलटी, जुलाब, मळमळ व कावीळसारखी लक्षणे आढळल्यास त्वरीत जवळच्या पालिका दवाखाने, रुग्णालयातील डॉक्टरांशी संपर्क साधावा.
