स्थलांतरित होण्यासाठी रहिवाशांना नोटिसा; १८८ इमारती मुंबईमध्ये अतिधोकादायक

मुंबई : मुंबई महापालिकेच्या विविध विभागांतर्गत असलेल्या निवासी इमारतींपैकी एकूण १८८ इमारती अतिधोकादायक आणि मोडकळीस आल्याचे आढळून आले आहे. ‘सी-१’ श्रेणीत मोडणाऱ्या या इमारतींची यादी पालिकेकडून संकेतस्थळावर जाहीर करण्यात आली आहे. या इमारती राहण्यास धोकादायक असल्यामुळे त्यात वास्तव्यास असणाऱ्या रहिवाशांनी सुरक्षितस्थळी स्थलांतरित व्हावे, असे आवाहन पालिका प्रशासनाकडून करण्यात आले आहे. अतिधोकादायक इमारतींमध्ये कोणतीही दुर्घटना घडल्यास व त्यात जीवित किंवा वित्तहानी झाल्यास त्याची संपूर्ण जबाबदारी वास्तव्य करणाऱ्या नागरिकांची राहील. त्यासाठी प्रशासन जबाबदार राहणार नाही, असे स्पष्ट करण्यात आले आहे. मुंबईत आजही जुन्या, ब्रिटिशकालीन इमारती असून पावसाळ्यापूर्वी यामधील धोकादायक इमारतींचे सर्वेक्षण पालिकेमार्फत केले जाते. यंदाच्या सर्वेक्षणातून १८८ अतिधोकादायक इमारती असल्याचे निदर्शनास आले आहे. यात सर्वाधिक ११४ अतिधोकादायक इमारती पश्चिम उपनगरात मालाड, बोरिवली, मुलुंड, अंधेरी या भागात आहेत. शहर भागातील २७ आणि पूर्व उपनगरातील ४७ इमारतींचा यामध्ये समावेश आहे.