२०.८४ कोटींची विनातिकीट प्रवाशांना पकडून दंडवसुली

मुंबई : लोकल, रेल्वेगाड्यामधून विनातिकीट प्रवाशांची संख्या वाढल्याने, तिकीटधारक प्रवाशांची डोकेदुखी वाढू लागली. त्यामुळे तिकीटधारक प्रवाशांकडून पश्चिम रेल्वेकडून वारंवार तक्रार केल्यानंतर, विनातिकीट प्रवाशांना पकडण्यासाठी विविध मोहिमा राबवून एप्रिल २०२४ मध्ये २.९४ लाख विनातिकीट प्रवाशांना पकडून २०.८४ कोटींची दंडवसुली करण्यात आली. एप्रिल २०२३ च्या तुलनेत दंडाच्या रकमेत २० टक्क्यांनी वाढ झाल्याचे पश्चिम रेल्वे प्रशासनाकडून सांगण्यात आले. पश्चिम रेल्वेवरील सर्व प्रवाशांना आरामदायी प्रवास आणि उत्तम सुविधा मिळाव्यात, यासाठी मुंबई लोकल सेवा, मेल-एक्स्प्रेस, पॅसेंजर ट्रेन्स आणि विशेष रेल्वेगाड्यांमध्ये तिकीट तपासणी मोहीम सातत्याने राबवली जात आहे. तिकीट नसलेल्या प्रवाशांना रोखण्यासाठी पश्चिम रेल्वेच्या वरिष्ठ व्यावसायिक अधिकाऱ्यांच्या देखरेखीखाली तिकीट तपासणी पथकाने एप्रिल २०२४ मध्ये अनेक तिकीट तपासणी मोहिमा राबविल्या. त्यातून १,६३,८१९ विनातिकीट प्रवाशांना पकडून २०.८४ कोटी रुपयांचा महसूल प्राप्त केला. यामधील मुंबई उपनगर विभागातून ५.५७ कोटी रुपयांचा समावेश आहे.

एप्रिल २०२४ मध्ये आरक्षित न केलेल्या सामानासह २.९४ लाख विनातिकीट, अनियमित प्रवाशांना पकडून २०.८४ कोटी रुपये वसूल करण्यात आले. याशिवाय एप्रिल महिन्यात पश्चिम रेल्वेने मुंबई उपनगरीय विभागात ९८ हजार प्रकरणे शोधून ५.५७ कोटी रुपयांचा दंड वसूल केला आहे. वातानुकूलित लोकलमध्ये विनातिकीट प्रवाशांना पकडण्यासाठी भरारी पथकाद्वारे तिकीट तपासणी मोहीम राबवण्यात आली. या मोहिमांद्वारे एप्रिल २०२४ मध्ये ४ हजारांहून अधिक विनातिकीट प्रवाशांना दंड आकारण्यात आला. तसेच, त्यांच्याकडून १३.७१ लाख रुपये दंड वसूल करण्यात आला आहे. या व्यतिरिक्त पश्चिम रेल्वेने ‘बॅटमन २.०’ तिकीट तपासणी मोहीम आयोजित केली होती. याद्वारे रात्रीच्या वेळी विनातिकीट प्रवास करणाऱ्या प्रवाशांना पकडण्यात आले. याद्वारे ३-४ मे च्या आणि ४-५ मे च्या रात्री विनातिकीट प्रवाशांना पकडून ३.४० लाख रुपयांची दंडवसुली केली. योग्य आणि वैध तिकीट घेऊन प्रवास करण्याचे आवाहन पश्चिम रेल्वे प्रशासनाने केले.

                                       एप्रिल २०२३                             एप्रिल २०२४

विनातिकीट प्रवासी              २.४६ लाख                                २.९४ लाख

दंडवसुली                          १६.७६ कोटी                              २०.८४ कोटी

मुंबई उपनगरीय विभाग ८३,५२२ प्रकरणे ९८ हजार प्रकरणे

दंडवसुली                         ४.७१ कोटी             ५.५७ कोटी

एसी लोकलमधील विनातिकीट ६,३०० प्रकरणे ४ हजार प्रकरणे

दंडवसुली                         २१.३४ लाख             १३.७१ लाख