मुंबई : एप्रिल महिन्यापासून उत्तर, पश्चिम, मध्य व ईशान्य मुंबईतील ३० लाख ग्राहकांच्या वीज देयकात सरासरी ३०० रुपयांची वाढ होण्याची शक्यता आहे. या भागातील अदानी इलेक्ट्रिसिटीच्या ग्राहकांवर दोन टप्प्यांत सरासरी १.२५ रुपये प्रति युनिट दराने ‘इंधन समायोजन शुल्क’ लावण्याचा निर्णय कंपनीने घेतला आहे. अतिरिक्त वीजखरेदीचा भार याद्वारे ग्राहकांवर टाकला जाणार आहे. त्यामुळे वीजग्राहकांना एप्रिल ते ऑगस्ट आणि सप्टेंबरमध्ये बिलात दरवाढीचे चटके सहन करावे लागणार आहेत. ग्राहकांची वीज मागणी पूर्ण करण्यासाठी वीज वितरण कंपन्यांचे वीज उत्पादकांशी करार असतात. मात्र मागणीइतकी वीज करारित स्वरूपात उपलब्ध नसल्यास कंपन्यांना प्रसंगी बाहेरून चढ्या दराने वीज खरेदी करावी लागते. त्यापोटी येणारा खर्च इंधन समायोजन शुल्काच्या (एफएसी) माध्यमातून ग्राहकांकडून वसूल केला जातो. अदानी इलेक्ट्रिसिटी कंपनीचा डिसेंबर २०२३ अखेरचा अतिरिक्त वीजखरेदी खर्च ३१९.३८ कोटी रुपये आहे. हा खर्च जुलै ते डिसेंबर २०२३ या सहा महिन्यांसह पुढे जानेवारी २०२५पर्यंत गृहित धरलेला आहे. त्यानुसार कंपनीने जून २०२४ पासून ग्राहकांकडून एफएसी वसूल करणे अपेक्षित होते. मात्र आयोगाने ही रक्कम एप्रिलपासून वसूल करण्यास सांगितले आहे.
अदानी इलेक्ट्रिसिटी मुंबई लिमिटेडला (एईएमएल) एकूण १९ महिन्यांच्या अतिरिक्त वीजखरेदीचा खर्च जून २०२४ ते मार्च २०२५ या कालावधीत वसूल करायचा आहे. ग्राहकांवर एफएसी लावण्याची कमाल मर्यादा ही २० टक्के असते. मात्र या वीस टक्क्यांमधून दहा महिन्यांत १९ महिन्यांचा खर्च वसूल होणे अशक्य आहे. यामुळे जुलै ते डिसेंबर २०२३मधील अतिरिक्त वीजखरेदीसाठीच्या खर्चाची वसुली एप्रिल २०२४पासूनच व्हावी, असे आयोगाने जारी केलेल्या प्रसिद्धी पत्रकात म्हटले आहे. यानुसार ग्राहकांकडून हे शुल्क एप्रिल ते ऑगस्ट २०२४ व सप्टेंबर असे दोन टप्प्यांत वसूल होणार आहे. घरगुती ग्राहकांचा सरासरी वीज वापर ३०० युनिट ग्राह्य धरल्यास त्यानुसार, अदानी इलेक्ट्रिसिटीच्या ग्राहकांचे वीज देयक किमान ३०० ते ३५० रुपयांनी महागणार आहे.
घरगुती किरकोळ ग्राहकांसाठी एफएसी असे (रुपये/युनिट)
वीज वापर श्रेणी (युनिटमध्ये) एप्रिल ते ऑगस्ट सप्टेंबर
०-१०० ०.७० ०.२०
१०१-३०० १.१० ०.२५
३०१-५०० १.५० ०.३०
५०० हून अधिक १.७० ०.३५
सरासरी १.२५ ०.२५
