ठाणे : पर्यावरणाचा समतोल राखण्यासाठी आणि प्लास्टिक प्रदूषणावर नियंत्रण मिळवण्यासाठी राज्य सरकारने ‘महा आर-पेट’ अभियानाला सुरुवात केली आहे. महाराष्ट्रातील १३ ठिकाणी राबविण्यात येणाऱ्या या अभियानाचा शुभारंभ ठाण्यातून करण्यात आला. शासनाचा कोणताही आर्थिक भार न घेता स्वयंसेवी संस्था (एनजीओ), कंपन्या आणि नागरिकांच्या सहकार्याने वापरलेल्या प्लास्टिक बाटल्यांचे संकलन व पुनर्प्रक्रिया केली जाणार आहे. अशा प्रकारचा उपक्रम राबविणारे महाराष्ट्र हे देशातील पहिले राज्य ठरणार असल्याचे राज्याच्या पर्यावरणमंत्री पंकजा मुंडे यांनी सांगितले. ठाण्यातील हॉटेल विवांत येथे हिंदुस्तान कोका-कोला बेव्हरेजेस कंपनी, महाराष्ट्र शासन, महाराष्ट्र प्रदूषण नियंत्रण मंडळ आणि ठाणे महानगरपालिका यांच्या संयुक्त विद्यमाने ‘महा आर-पेट बॉटल व स्टिकर्स अनावरण आणि उद्घाटन’ कार्यक्रम आयोजित करण्यात आला होता. यावेळी महाराष्ट्र प्रदूषण नियंत्रण मंडळाचे सदस्य सचिव राहुल रेखावार, कोका कोला कंपनीचे अधिकारी, प्रसिद्ध कलाकार आणि विविध क्षेत्रांतील मान्यवर उपस्थित होते.
यावेळी बोलताना पर्यावरणमंत्री पंकजा मुंडे म्हणाल्या की, प्लास्टिकचा वापर कमी करणे ही आजच्या काळाची गरज आहे. प्लास्टिक दीर्घकाळ टिकणारे असले तरी त्याचे पर्यावरणावर होणारे परिणाम गंभीर आहेत. “एक बॉटल पर्यावरण के नाम” या संकल्पनेतून प्रत्येक नागरिकाने या अभियानात सहभागी व्हावे, असे आवाहन त्यांनी केले. पर्यावरण संवर्धनासाठी केवळ जनजागृती पुरेशी नसून प्रत्यक्ष कृती करण्याची गरज असल्याचेही त्यांनी स्पष्ट केले. आमदार माधवी नाईक यांनी या अभियानाचे स्वागत करत नागरिक आणि लोकप्रतिनिधींकडून पूर्ण सहकार्य केले जाईल, असे सांगितले. आमदार निरंजन डावखरे यांनी प्लास्टिक प्रदूषण कमी करण्यासाठी कंपन्यांनीही पुढाकार घेण्याची गरज व्यक्त केली. अपर जिल्हाधिकारी हरिश्चंद्र पाटील यांनी ठाणे जिल्ह्याची या उपक्रमासाठी निवड झाल्याबद्दल समाधान व्यक्त करत प्रशासनाकडून पूर्ण सहकार्य केले जाईल, असे सांगितले. महाराष्ट्र प्रदूषण नियंत्रण मंडळाचे सदस्य सचिव राहुल रेखावार यांनी सांगितले की, पर्यावरणावरील ताण कमी करण्यासाठी हा उपक्रम महत्त्वाचा असून, फेब्रुवारी २०२६ मध्ये मुंबईत याची सुरुवात झाली होती. आता नियोजनबद्ध पद्धतीने हा उपक्रम नागरिकांपर्यंत पोहोचवण्यात येणार असून, ‘लाईफ’ (LiFE) संकल्पनेच्या माध्यमातून २०४७ पर्यंत कार्बन न्यूट्रॅलिटीचे उद्दिष्ट साध्य करण्यासाठी प्रयत्न केले जाणार आहेत.
