ठाणे : आपल्या दमदार अभिनयाने प्रेक्षकांची मनं जिंकणारा ‘महाराष्ट्राची हास्यजत्रा’ फेम अभिनेता पृथ्विक प्रताप आता सामाजिक कार्यामुळेही चर्चेत आला आहे. ठाणे जिल्ह्यातील शहापूर तालुक्यातील नदीचवाडी गावातील जिल्हा परिषद शाळेची पुनर्बांधणी करण्याचा महत्त्वपूर्ण निर्णय त्याने घेतला आहे. केवळ शाळेची इमारत उभारणे हा त्याचा उद्देश नसून, ग्रामीण भागातील मुलांना दर्जेदार शिक्षण मिळावे आणि त्यांच्यासाठी उज्ज्वल भविष्याची दारे खुली व्हावीत, ही त्यामागील भूमिका आहे. समाजाचे काहीतरी देणे लागते, या भावनेतून पृथ्विक हा उपक्रम राबवत असून, शिक्षणाच्या माध्यमातून मुलांमध्ये आत्मविश्वास, स्वावलंबन आणि जीवनाकडे पाहण्याचा सकारात्मक दृष्टिकोन निर्माण व्हावा, यासाठी तो प्रयत्नशील आहे. ‘परिजात’ संस्थेच्या माध्यमातून हा प्रकल्प राबविण्यात येत असून, ग्रामीण भागातील मुलांना शिक्षणाची समान संधी उपलब्ध करून देण्यावर विशेष भर दिला जाणार आहे.
नदीचवाडी येथील जिल्हा परिषद शाळा कमी पटसंख्येमुळे बंद होण्याच्या मार्गावर होती. मात्र, वीटभट्टीवरील कामगार आणि मोलमजुरी करणाऱ्या कुटुंबांतील मुलांना शाळेत प्रवेश घेण्यासाठी प्रोत्साहन देण्यात आल्याने शाळेची पटसंख्या वाढून ती सध्या २४ विद्यार्थ्यांपर्यंत पोहोचली आहे. या शाळेची पुनर्बांधणी करण्यासोबतच परिसरातील विकासकामांनाही गती दिली जाणार आहे. पृथ्विक प्रतापने सांगितले की, आपली छोटीशी मदतही एखाद्या विद्यार्थ्याचे आयुष्य बदलू शकते आणि शिक्षणाच्या माध्यमातून त्याला नवीन संधी मिळू शकतात. या उपक्रमासाठी स्वप्नील पाथरे आणि ‘परिजात’ संस्थेचे महत्त्वपूर्ण सहकार्य लाभले आहे. शाळा उभी करणे हा केवळ पहिला टप्पा असून, त्या शाळेतून शिकणाऱ्या प्रत्येक मुलाला पुढे जाण्याची संधी मिळावी, हा आपल्या उपक्रमाचा खरा उद्देश असल्याचे पृथ्विकने स्पष्ट केले. ग्रामीण शिक्षणाला बळ देणारा हा उपक्रम समाजासाठी प्रेरणादायी ठरत असून, अनेकांना शिक्षण क्षेत्रात योगदान देण्यासाठी प्रोत्साहित करणारा ठरत आहे.
