मुंबई : राज्यातील नागरिकांना दर्जेदार आणि सुरक्षित औषधे उपलब्ध करून देण्यासाठी आरोग्य विभागाने महत्त्वपूर्ण पाऊल उचलले आहे. राज्यातील आरोग्य संस्थांमध्ये उपलब्ध असलेल्या औषधांची गुणवत्ता तपासण्यासाठी ‘काउंटरफिट ड्रग डिटेक्शन डिव्हाइस’ या अत्याधुनिक उपकरणाचा प्रायोगिक तत्त्वावर वापर करण्यात येणार आहे. आरोग्यमंत्री प्रकाश आबिटकर यांनी राज्यातील सर्व आरोग्य संस्थांमधील औषध साठ्याची गुणवत्ता तपासण्याचे निर्देश दिले आहेत. मुंबईतील आरोग्यसेवा आयुक्तालयात आयोजित बैठकीत ते बोलत होते. औषधांच्या गुणवत्तेबाबत कोणतीही तडजोड केली जाणार नसून, नागरिकांना सुरक्षित आणि गुणवत्तापूर्ण औषधे मिळावीत यासाठी आरोग्य यंत्रणा अधिक सक्षम करण्यात येत असल्याचे आरोग्यमंत्र्यांनी स्पष्ट केले.
या नव्या तपासणी प्रक्रियेसाठी राज्यात स्वतंत्र पथके तयार करण्यात येणार आहेत. ही पथके राज्यातील आठही परिमंडळांमधील आरोग्य संस्थांमध्ये जाऊन औषधांची गुणवत्ता तपासणार आहेत. प्राथमिक आरोग्य केंद्रांपासून ते मोठ्या आरोग्य संस्थांपर्यंत उपलब्ध असलेल्या औषध साठ्याची तपासणी या माध्यमातून केली जाणार आहे. यामुळे औषधांच्या दर्जावर सतत देखरेख ठेवणे शक्य होणार असून, निकृष्ट किंवा बनावट औषधांचा धोका कमी करण्यास मदत होणार आहे. औषध तपासणीसाठी आरोग्य विभागांतर्गत कार्यरत असलेल्या तज्ज्ञ औषधनिर्मात्यांची (फार्मासिस्ट) स्वतंत्र टीम तयार करण्यात येणार आहे. या टीममधील सदस्यांना ‘ड्रग डिटेक्शन मशीन’च्या माध्यमातून औषध तपासणी करण्याचे विशेष प्रशिक्षण दिले जाणार आहे. बैठकीत या उपकरणाच्या कार्यपद्धतीचे सादरीकरण करण्यात आले. याशिवाय पुरवठादारांकडून आरोग्य विभागाला उपलब्ध करून दिल्या जाणाऱ्या औषधांच्या दर्जाची तपासणी करण्यासाठी स्वतंत्र यंत्रणा कार्यान्वित करण्याच्या सूचनाही आरोग्यमंत्री प्रकाश आबिटकर यांनी दिल्या. औषधांचा पुरवठा, साठवणूक आणि वापर या संपूर्ण प्रक्रियेत गुणवत्ता कायम ठेवण्यावर आरोग्य विभागाचा भर राहणार आहे. या बैठकीला राज्य वस्तू खरेदी प्राधिकरणाचे मुख्य कार्यकारी अधिकारी डॉ. बापू पवार, आरोग्य संचालक (मुंबई) डॉ. नितीन अंबाडेकर, आरोग्य संचालक (पुणे) डॉ. विजय कंदेवाड, सहसंचालक सुनीता गोल्हाईत यांच्यासह संबंधित अधिकारी उपस्थित होते.
