मुंबई : मुंबई महापालिकेच्या प्रशासनात डिजिटल तंत्रज्ञानाचा वापर वाढविण्याच्या दिशेने आणखी एक महत्त्वाचे पाऊल उचलण्यात येत असून, लवकरच महापालिकेचे सभागृह आणि विविध समित्यांचे कामकाज पूर्णपणे पेपरलेस करण्यात येणार आहे. महापालिका आयुक्त आश्विनी भिडे यांच्या पुढाकाराने राबविण्यात येणाऱ्या या उपक्रमाअंतर्गत महापालिकेतील २३७ नगरसेवकांना अत्याधुनिक टॅब उपलब्ध करून दिले जाणार आहेत. या टॅबच्या माध्यमातून सभागृहाच्या पटलावरील विषयपत्रिका, विविध समित्यांचे प्रस्ताव आणि संबंधित कागदपत्रे डिजिटल स्वरूपात उपलब्ध होतील. विशेष ॲपच्या माध्यमातून नगरसेवकांना प्रस्तावांची सॉफ्ट कॉपी पाहता आणि वाचता येणार असून, कागदी कागदपत्रांवरील अवलंबित्व मोठ्या प्रमाणात कमी होणार आहे. पुढील एका महिन्यात टॅबचे वितरण पूर्ण करून सभागृहासह सर्व समित्यांचे कामकाज आधुनिक आणि पेपरलेस पद्धतीने सुरू करण्याचा महापालिकेचा मानस आहे.
सध्या मुंबई महापालिकेतील २२७ निवडून आलेले तसेच १० नामनिर्देशित सदस्य अशा एकूण २३७ नगरसेवकांना सभागृहातील मासिक बैठकींच्या विषयपत्रिका आणि स्थायी समिती, शिक्षण समिती, सुधार समिती, १७ प्रभाग समित्या तसेच महिला व बालकल्याण, आरोग्य, विधी व महसूल, स्थापत्य शहर आणि स्थापत्य उपनगरे आदी समित्यांच्या प्रस्तावांच्या प्रती सचिव विभागामार्फत त्यांच्या निवासस्थानी पाठविल्या जातात. या प्रक्रियेसाठी मोठ्या प्रमाणावर कागदाचा वापर आणि वितरण व्यवस्था करावी लागते. आता आयटी विभागाच्या माध्यमातून ॲपल कंपनीचे १३ इंची टॅब खरेदी करण्याची प्रक्रिया अंतिम टप्प्यात असून, या टॅबमध्ये विशेष ॲपद्वारेच प्रस्ताव पाहण्याची सुविधा असेल. त्यामुळे टॅबची मेमरी भरली जाणार नाही आणि सर्व कागदपत्रे सुरक्षित डिजिटल स्वरूपात उपलब्ध राहतील. प्रत्येक प्रस्ताव पाहण्यासाठी स्वतंत्र सुरक्षा कोडची सुविधा दिली जाणार असून, टॅबचे वितरण झाल्यानंतर नगरसेवकांना त्याच्या वापराबाबत प्रशिक्षणही देण्यात येणार आहे. या उपक्रमामुळे महापालिकेच्या कामकाजात पारदर्शकता, वेग आणि कार्यक्षमतेत वाढ होण्याबरोबरच कागदाचा वापर मोठ्या प्रमाणात कमी होऊन पर्यावरण संरक्षणालाही हातभार लागणार आहे.
