मुंबई : सुमारे १७ वर्षांपूर्वीच्या म्हणजेच २००९ मधील कल्याण लोकसभा मतदारसंघातील गाजलेल्या निवडणूक वादप्रकरणी कल्याण न्यायालयाने शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे आणि राज्याचे उपमुख्यमंत्री एकनाथ शिंदे यांना अधिकृत समन्स बजावले आहेत. न्यायालयाच्या आदेशानुसार उद्धव ठाकरे यांनी ५ ऑगस्ट रोजी, तर एकनाथ शिंदे यांनी ६ ऑगस्ट रोजी कल्याण न्यायालयात हजर राहण्याचे निर्देश देण्यात आले आहेत. एकाच जुन्या प्रकरणात राज्यातील दोन प्रमुख राजकीय नेत्यांना सलग दोन दिवस न्यायालयात उपस्थित राहण्याचे आदेश मिळाल्याने राजकीय आणि कायदेशीर वर्तुळात या घडामोडींची मोठी चर्चा सुरू झाली आहे. हे प्रकरण २००९ च्या कल्याण लोकसभा निवडणुकीदरम्यान झालेल्या प्रचारसभेशी संबंधित आहे. त्या निवडणुकीत राष्ट्रवादी काँग्रेसचे दिवंगत नेते वसंत डावखरे आणि शिवसेनेचे उमेदवार आनंद परांजपे यांच्यात लढत झाली होती. प्रचारादरम्यान २२ एप्रिल २००९ रोजी डोंबिवली येथे आयोजित करण्यात आलेल्या शिवसेनेच्या जाहीर सभेत तत्कालीन कार्याध्यक्ष उद्धव ठाकरे यांनी व्यासपीठावरून वसंत डावखरे यांचा कथित व्हिडिओ मोठ्या पडद्यावर दाखवला होता. या व्हिडिओमध्ये वसंत डावखरे हे आपल्या कार्यकर्त्यांना निवडणूक कोणत्याही परिस्थितीत जिंकण्याचे आवाहन करताना तसेच पोलीस प्रशासन आणि निवडणूक अधिकाऱ्यांची भीती बाळगू नये, असे कथित वक्तव्य करताना दिसत असल्याचा दावा करण्यात आला होता. या व्हिडिओमुळे त्या काळात निवडणुकीच्या वातावरणात मोठा वाद निर्माण झाला होता आणि त्याचे पडसाद राजकीय क्षेत्रात उमटले होते.
मात्र, वसंत डावखरे यांनी हा व्हिडिओ पूर्णपणे बनावट, संपादित आणि मॉर्फ केलेला असल्याचा आरोप करत त्याचा तीव्र निषेध केला होता. पत्रकार परिषदेत त्यांनी शिवसेनेने सादर केलेला व्हिडिओ मूळ नसून, आपली राजकीय आणि सामाजिक प्रतिमा मलिन करण्यासाठी जाणीवपूर्वक त्यामध्ये फेरफार करण्यात आल्याचा गंभीर आरोप केला होता. त्यानंतर त्यांनी कल्याण न्यायालयात फौजदारी खटला दाखल केला. या खटल्यात उद्धव ठाकरे यांच्यासह त्या वेळी ठाणे जिल्हा संघटक असलेले आणि सध्या राज्याचे उपमुख्यमंत्री असलेले एकनाथ शिंदे, शिवसेनेचे उमेदवार आनंद परांजपे आणि स्थानिक नेते रमाकांत देवळेकर यांना सहआरोपी करण्यात आले होते. हे प्रकरण अनेक वर्षे न्यायालयात प्रलंबित राहिल्यानंतर आता न्यायालयाने सुनावणीला गती देत उद्धव ठाकरे आणि एकनाथ शिंदे यांना समन्स जारी केले आहेत. त्यानुसार ५ ऑगस्ट रोजी उद्धव ठाकरे आणि ६ ऑगस्ट रोजी एकनाथ शिंदे यांनी न्यायालयासमोर हजर राहून आपली बाजू मांडायची आहे. ते न्यायालयात स्वतः उपस्थित राहणार की आपल्या वकिलांमार्फत कायदेशीर भूमिका मांडणार, याकडे आता सर्वांचे लक्ष लागले आहे. या सुनावणीमुळे २००९ मधील गाजलेल्या निवडणूक वादप्रकरणाला पुन्हा एकदा नव्याने राजकीय आणि कायदेशीर महत्त्व प्राप्त झाले असून, आगामी घडामोडींवर राज्यभरातील राजकीय वर्तुळाचे लक्ष केंद्रित झाले आहे.
