मुंबई : राज्यभरात गुरुपौर्णिमा मोठ्या भक्तिभावाने आणि उत्साहात साजरी होत असताना देवपूजा आणि गुरूपूजेसाठी फुलांच्या खरेदीला मोठी गर्दी झाली होती. या पार्श्वभूमीवर मुंबईतील दादर येथील मीनाताई ठाकरे फूल मार्केटमध्ये महापालिकेने केलेल्या कारवाईमुळे मोठा वाद निर्माण झाला आहे. गुरुपौर्णिमेच्या दिवशी राज्याच्या विविध भागांतून मोठ्या प्रमाणावर फुलांची आवक झाली होती. शेतकरी आणि व्यापाऱ्यांनी विक्रीसाठी फुलांच्या पेट्या आणि क्रेट्स बाजारात मांडून ठेवल्या होत्या. मात्र, सकाळच्या सुमारास महापालिकेचे अधिकारी आणि कर्मचारी बुलडोझर तसेच अन्य यंत्रसामग्रीसह बाजारात दाखल झाले. त्यानंतर त्यांनी फुलांच्या क्रेट्सवर थेट कारवाई करण्यास सुरुवात केली. या कारवाईत मोठ्या प्रमाणावर फुलांची नासधूस झाली. काही मिनिटांतच विक्रीसाठी आणलेली फुले चिरडली गेल्याने व्यापारी आणि शेतकरी संतप्त झाले. गुरुपौर्णिमेसारख्या दिवशी फुलांना सर्वाधिक मागणी असताना झालेल्या या कारवाईमुळे अनेकांचे मोठे आर्थिक नुकसान झाल्याचा दावा करण्यात आला आहे. कारवाई सुरू होताच व्यापाऱ्यांनी आणि शेतकऱ्यांनी घटनास्थळी तीव्र विरोध दर्शविला. महापालिका अधिकारी आणि व्यापाऱ्यांमध्ये शाब्दिक वाद झाला. काही काळ बाजारात तणावपूर्ण वातावरण निर्माण झाले होते. अनेक नागरिक आणि खरेदीदारही या प्रकारामुळे घटनास्थळी जमा झाले. त्यामुळे संपूर्ण परिसरात गोंधळाचे वातावरण निर्माण झाले.
या कारवाईबाबत स्थानिक व्यापाऱ्यांनी महापालिकेवर गंभीर आरोप केले आहेत. त्यांच्या म्हणण्यानुसार, संबंधित वॉर्ड अधिकाऱ्यांचा तपासणी दौरा असल्यामुळे वरिष्ठांना काम दाखविण्यासाठी ही कारवाई करण्यात आली. कोणतीही पूर्वसूचना न देता किंवा पर्यायी व्यवस्था न करता थेट बुलडोझर चालविण्यात आल्याने लहान व्यापारी आणि शेतकऱ्यांना मोठा फटका बसल्याचा आरोप त्यांनी केला. या कारवाईत एक लाख रुपयांपेक्षा अधिक किमतीच्या फुलांचे नुकसान झाल्याचा दावा व्यापाऱ्यांनी केला असून नुकसानभरपाईची मागणीही त्यांनी केली आहे. कारवाईनंतर महापालिका कर्मचारी आणि व्यापाऱ्यांमध्ये जोरदार खडाजंगी झाली. परिस्थिती चिघळू नये म्हणून परिसरात मोठ्या प्रमाणावर नागरिकांची गर्दी झाली होती. दरम्यान, मागील काही महिन्यांपासून दादर परिसरात सकाळी व्यवसाय करणाऱ्या भाजी विक्रेते, मासळी विक्रेते आणि आता फूल व्यापाऱ्यांवर सातत्याने कारवाई होत असल्याचा आरोप व्यापारी संघटनांनी केला आहे. त्यामुळे महापालिकेच्या अतिक्रमणविरोधी मोहिमेच्या पद्धतीवर आणि प्राधान्यक्रमावर प्रश्न उपस्थित केले जात आहेत. व्यापाऱ्यांचे म्हणणे आहे की, सणासुदीच्या काळात आणि सर्वाधिक विक्रीच्या दिवशी अशा प्रकारची कारवाई टाळायला हवी होती. यामुळे शेतकरी, व्यापारी आणि ग्राहक तिघांच्याही हिताला धक्का बसला आहे. या प्रकरणाची चौकशी करून संबंधित जबाबदार अधिकाऱ्यांवर कारवाई करावी तसेच नुकसानग्रस्त व्यापाऱ्यांना योग्य भरपाई द्यावी, अशी मागणी व्यापाऱ्यांकडून करण्यात येत आहे. मात्र, या प्रकरणावर महापालिकेकडून अद्याप अधिकृत भूमिका जाहीर करण्यात आलेली नाही.
