वृत्तसंस्था : भारताने झिम्बाब्वेविरुद्धच्या टी-२० मालिकेची विजयी सुरुवात करत पहिल्या सामन्यात ७ विकेट्स राखून शानदार विजय मिळवला. १२६ धावांचे लक्ष्य भारताने अवघ्या १३.२ षटकांत पूर्ण करत मालिकेत १-० अशी आघाडी घेतली. या विजयाचा शिल्पकार युवा फलंदाज वैभव सूर्यवंशी ठरला. त्याने झंझावाती फलंदाजी करत केवळ १८ चेंडूत अर्धशतक पूर्ण केले आणि झिम्बाब्वेच्या गोलंदाजांचा अक्षरशः समाचार घेतला. अर्धशतकानंतर लगेच तो बाद झाला असला, तरी त्याच्या आक्रमक खेळीमुळे भारताचा विजय जवळपास निश्चित झाला होता.
भारताच्या डावाची सुरुवात वैभव सूर्यवंशी आणि अभिषेक शर्मा यांनी केली. मात्र, अभिषेक शर्मा अवघ्या १ धावेवर बाद झाल्याने भारताला सुरुवातीला धक्का बसला. त्यानंतर वैभवने चौफेर फटकेबाजी करत झिम्बाब्वेच्या गोलंदाजांवर वर्चस्व गाजवले. दुसऱ्या बाजूला ईशान किशनने २४ चेंडूत ३५ धावांची संयमी आणि उपयुक्त खेळी करत संघाला उत्तम साथ दिली. त्याच्या खेळीत ३ चौकार आणि २ षटकारांचा समावेश होता. दोघांच्या दमदार फलंदाजीमुळे भारताने लक्ष्य सहज पार केले. यापूर्वी भारतीय कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला. भारतीय गोलंदाजांनी सुरुवातीपासूनच अचूक मारा करत झिम्बाब्वेच्या फलंदाजीवर नियंत्रण ठेवले. झिम्बाब्वेचा डाव २० षटकांत ७ बाद १२५ धावांवर आटोपला. त्यांच्या डावात वेस्ले मधेवेरेने सर्वाधिक ३९ धावा केल्या, तर रायन बर्लने २६ धावांचे योगदान दिले. मात्र, इतर फलंदाजांना भारतीय गोलंदाजांसमोर मोठी खेळी करता आली नाही. भारताकडून मयंक यादव आणि प्रिन्स यादव यांनी प्रत्येकी २ विकेट्स घेत झिम्बाब्वेला मोठी धावसंख्या उभारण्यापासून रोखले. शिवम दुबे आणि रवी बिश्नोई यांनीही प्रत्येकी एक विकेट घेत प्रभावी साथ दिली. मयंक यादवने पहिल्याच षटकात ब्रायन बेनेटला बाद करत भारताला शानदार सुरुवात करून दिली, तर प्रिन्स यादवने बेन करनला माघारी धाडले. डायोन मायर्स आणि सिकंदर रजा यांनाही भारतीय गोलंदाजांनी स्वस्तात बाद केले. या सामन्यात अशोक शर्माने भारताकडून टी-२० आंतरराष्ट्रीय क्रिकेटमध्ये पदार्पण केले. भारताचा सर्वांगीण खेळ पाहता पहिल्याच सामन्यात संघाने आपले वर्चस्व सिद्ध केले आहे. आता मालिकेतील दुसरा सामना २५ जुलै रोजी खेळवला जाणार असून, भारताला मालिकेत आघाडी अधिक मजबूत करण्याची संधी असेल.
