मुंबई : मुंबईकरांचे दैनंदिन आयुष्य म्हणजे लोकल रेल्वे, वाहतूक कोंडी आणि वेळेशी सुरू असलेली सततची धावपळ. अशा परिस्थितीत प्रवासाचा शेवटचा टप्पा अधिक सोयीस्कर, आरामदायी आणि खर्चविरहित व्हावा, यासाठी महत्त्वाचा उपक्रम सुरू करण्यात आला आहे. वांद्रे-कुर्ला संकुल (बीकेसी) मेट्रो स्थानकातून जुलै महिन्यात प्रत्येक शुक्रवारी मोफत फीडर बससेवा उपलब्ध करून देण्यात येणार आहे. या उपक्रमाची सुरुवात झाली असून, प्रवाशांना मेट्रो स्थानकापासून त्यांच्या कार्यालयापर्यंत किंवा जवळच्या परिसरात सहज पोहोचण्याची सुविधा मिळणार आहे. मुंबई महानगर प्रदेश विकास प्राधिकरण, मुंबई मेट्रो रेल्वे महामंडळ आणि डब्ल्यूआरआय इंडिया यांच्या संयुक्त विद्यमाने हा उपक्रम राबविण्यात येत असून, सिटीफ्लोच्या माध्यमातून या बससेवेचे संचालन केले जाणार आहे.
प्रवाशांसाठी बीकेसी मेट्रो स्थानकाच्या प्रवेशद्वार ए-१ आणि ए-२ येथे फीडर बसेस उपलब्ध असतील. मेट्रोने बीकेसी येथे पोहोचल्यानंतर पुढील प्रवासासाठी वाहतुकीची सुविधा सहज मिळत नसल्याने अनेकांना अडचणींचा सामना करावा लागतो. विशेषतः कार्यालयीन वेळेत वाहतूक कोंडीमुळे प्रवाशांचा वेळ आणि पैसा दोन्ही खर्च होतात. ही समस्या कमी करण्याच्या उद्देशाने सुरू करण्यात आलेली मोफत फीडर बससेवा महत्त्वाची ठरणार आहे. जुलै महिन्यातील प्रत्येक शुक्रवारी ही सेवा पूर्णपणे मोफत उपलब्ध असणार असल्याने बीकेसी परिसरात काम करणारे कर्मचारी, विद्यार्थी तसेच इतर प्रवाशांना मोठा दिलासा मिळणार आहे. मेट्रो आणि शेवटच्या प्रवासाच्या टप्प्यातील दुवा अधिक सक्षम करण्याच्या दृष्टीने हा उपक्रम महत्त्वाचा मानला जात असून, भविष्यात अशा प्रकारच्या सेवांचा विस्तार इतर मेट्रो स्थानकांवरही होण्याची अपेक्षा व्यक्त केली जात आहे.
बसचा मार्ग आणि कव्हर होणारी प्रमुख ठिकाणे :
ही मोफत फीडर बस बीकेसीमधील सर्व प्रमुख व्यावसायिक कार्यालये आणि संकुलांना जोडेल. बसच्या मार्गामध्ये खालील प्रमुख थांब्यांचा समावेश असेल:
- जिओ वर्ल्ड प्लाझा (Jio World Plaza)
- वन बीकेसी (One BKC)
- मेकर मॅक्सिटी (Maker Maxity)
- आयसीआयसीआय बँक बस स्टॉप (ICICI Bus Stop)
- भारत डायमंड बोर्स – गेट ७ (BDB Gate 7)
- एमएमआरडीए कार्यालय (MMRDA Office)
- कलानगर (Kalanagar)
- क्रेसेन्झो (Crescenzo)
- जेटवान (Jetwan)
