भिवंडी : अन्न, नागरी पुरवठा विभागाच्या राज्यस्तरीय दक्षता पथकाने भिवंडीतील मिठपाडा परिसरात मोठी कारवाई करत अवैधरित्या साठवून ठेवलेले ७५० व्यावसायिक गॅस सिलेंडर जप्त केले. या कारवाईत सुमारे १२ लाख ८० हजार रुपयांचा मुद्देमाल हस्तगत करण्यात आला असून संबंधितांविरुद्ध कायदेशीर कारवाईची प्रक्रिया सुरू करण्यात आली आहे. नियंत्रक शिधावाटप चंद्रकांत डांगे यांच्या मार्गदर्शनाखाली मिळालेल्या गोपनीय माहितीच्या आधारे पथकाने पारोळ रोडवरील दोन गाळ्यांवर अचानक छापा टाकला.
तपासणीदरम्यान कोणतीही वैध परवानगी नसताना मोठ्या प्रमाणावर व्यावसायिक गॅस सिलेंडरची साठवणूक करण्यात आल्याचे निदर्शनास आले. कारवाईत ५ किलो वजनाचे ६५३ भरलेले सिलेंडर, ९२ रिकामे सिलेंडर आणि १९ किलो वजनाचे ६ रिकामे सिलेंडर असा एकूण ७५० सिलेंडरचा साठा जप्त करण्यात आला. अधिकाऱ्यांनी दिलेल्या माहितीनुसार, जप्त करण्यात आलेल्या मुद्देमालाची किंमत अंदाजे १२ लाख ८० हजार रुपये आहे. या प्रकरणी संबंधित आरोपींविरोधात जीवनावश्यक वस्तू कायद्याअंतर्गत स्थानिक पोलीस ठाण्यात गुन्हा दाखल करण्याची प्रक्रिया सुरू आहे. उपनियंत्रक शिधावाटप गणेश बेल्लाळे, पुरवठा निरीक्षण अधिकारी गौतम राऊत तसेच शिधावाटप निरीक्षक रविंद्र राठोड, राजीव भेले, विकास नागदिवे, राहुल इंगळे, अरुण काते, देवानंद थोरवे, राजेश सोरते आणि पवन कुंभले यांच्या संयुक्त पथकाने ही कारवाई केली. अन्न, नागरी पुरवठा विभागाने स्पष्ट केले की, अवैध गॅस साठवणुकीमुळे नागरिकांच्या सुरक्षिततेला गंभीर धोका निर्माण होऊ शकतो. तसेच अशा प्रकारांमुळे गॅसचा काळाबाजार वाढण्याची शक्यता असते. त्यामुळे बेकायदेशीर साठवणूक आणि वितरण करणाऱ्यांविरोधात यापुढेही कठोर कारवाई सुरू ठेवण्यात येणार असल्याचा इशारा विभागाने दिला आहे.
