पुणे/कोल्हापूर : ‘सुरक्षित अन्न, सुरक्षित औषध आणि सुरक्षित महाराष्ट्र’ या मोहिमेअंतर्गत अन्न व औषध प्रशासनाने (एफडीए) औषध क्षेत्रातील नियमभंगाविरोधात कारवाईचा धडाका सुरू ठेवला आहे. पतंजलीच्या काही उत्पादनांवर कारवाई केल्यानंतर आता एफडीएने देशातील आघाडीची औषध उत्पादक कंपनी मेसर्स सिप्ला फार्मा अँड लाइफ सायन्सेस लिमिटेडच्या पुण्यातील गोदामावर कारवाई केली आहे. अन्न व औषध प्रशासनाचे आयुक्त तुकाराम मुंढे यांच्या नेतृत्वाखाली ही मोहीम राबविण्यात येत असून या कारवाईमुळे औषध उद्योग क्षेत्रात खळबळ उडाली आहे. ८ जून रोजी पुणे आणि कोल्हापूर येथे करण्यात आलेल्या तपासणीत एकूण २४ लाख ८१ हजार रुपयांचा बेकायदेशीर औषधसाठा जप्त करण्यात आला. पुण्यातील वडकी येथील सिप्लाच्या गोदामाची तपासणी करताना ‘रेक्टीन प्लस टॅब्लेट’ या ‘शेड्युल एच’ श्रेणीतील औषधाच्या वेष्टनावर वापराबाबत जाहिरात करण्यात आल्याचे आढळून आले. ही बाब औषधे व सौंदर्यप्रसाधने नियम, १९४५ मधील तरतुदींशी विसंगत असल्याचे निदर्शनास आल्यानंतर संबंधित औषधाचा सुमारे ११ लाख १९ हजार रुपये किमतीचा साठा जप्त करण्यात आला.
दरम्यान, कोल्हापूरमधील रविवार पेठ येथे असलेल्या मे. मेडटॅब्स फार्मा प्रायव्हेट लिमिटेडवरही एफडीएने छापा टाकला. तपासणीदरम्यान मोठ्या प्रमाणात ॲलोपॅथिक औषधे, विशेषतः प्रतिजैविक इंजेक्शनचा साठा आढळून आला. या औषधांच्या खरेदी-विक्रीसाठी आवश्यक परवाने आणि वैध कागदपत्रे सादर करण्यात संबंधित संस्था अपयशी ठरल्याने औषधे व सौंदर्यप्रसाधने अधिनियम, १९४० च्या तरतुदींचे उल्लंघन झाल्याचे स्पष्ट झाले. याप्रकरणी औषधांचे नमुने तपासणीसाठी पाठविण्यात आले असून उर्वरित २९ प्रकारच्या औषधांचा १३ लाख ६२ हजार १४७ रुपये किमतीचा साठा जप्त करण्यात आला आहे. अन्न व औषध प्रशासनाने नागरिकांना औषधे केवळ अधिकृत आणि परवानाधारक विक्रेत्यांकडूनच खरेदी करण्याचे आवाहन केले आहे. तसेच औषध उत्पादक आणि विक्रेत्यांनी सर्व नियमांचे काटेकोर पालन करावे, असेही प्रशासनाने स्पष्ट केले आहे. राज्यात औषध उत्पादन, साठवण, वितरण आणि विक्री क्षेत्रातील कोणतीही बेकायदेशीर बाब खपवून घेतली जाणार नसून नागरिकांच्या आरोग्याशी खेळणाऱ्यांविरोधात कठोर आणि सातत्यपूर्ण कारवाई सुरूच राहणार असल्याचा इशाराही एफडीएने दिला आहे.
