वृत्तसंस्था : भारत आणि अफगाणिस्तान यांच्यातील आगामी मालिकेपूर्वी भारतीय संघाला मोठा धक्का बसला आहे. स्टार फलंदाज विराट कोहली हॅमस्ट्रिंग दुखापतीमुळे अफगाणिस्तानविरुद्धच्या तीन सामन्यांच्या वनडे मालिकेतून बाहेर पडल्याची माहिती समोर आली आहे. ही मालिका १३ जूनपासून सुरू होणार असून त्यापूर्वी ६ जूनपासून एकमेव कसोटी सामना खेळवला जाणार आहे.
आयपीएलनंतर बऱ्याच कालावधीनंतर भारतीय संघाकडून खेळण्यासाठी सज्ज असलेल्या कोहलीच्या अनुपस्थितीमुळे चाहत्यांना मोठा धक्का बसला आहे. बीसीसीआयशी संबंधित सूत्रांच्या माहितीनुसार, हॅमस्ट्रिंगच्या दुखापतीमुळे त्याला विश्रांती देण्याचा निर्णय घेण्यात आला आहे. मात्र, त्याच्या जागी कोणाला संधी दिली जाणार याबाबत अद्याप अधिकृत घोषणा करण्यात आलेली नाही. अलीकडेच आयपीएल २०२६ मध्ये Royal Challengers Bengaluru संघाला विजेतेपद मिळवून देण्यात कोहलीने महत्त्वाची भूमिका बजावली होती. अंतिम सामन्यात त्याने गुजरात टायटन्सविरुद्ध नाबाद ७५ धावांची खेळी केली होती. त्या सामन्यादरम्यान त्याला धावताना त्रास होत असल्याचेही दिसून आले होते आणि त्याच दुखापतीचा परिणाम आता वनडे मालिकेवर झाला आहे. दरम्यान, आयपीएल संपल्यानंतर कोहलीने पत्नी अनुष्का शर्मा हिच्यासह वृंदावन येथील आश्रमाला भेट दिली होती. त्यांचे व्हिडिओ सोशल मीडियावरही मोठ्या प्रमाणात व्हायरल झाले होते. आता सर्वांचे लक्ष कोहलीच्या पुनरागमनाकडे लागले असून आगामी मालिकेत त्याच्या अनुभवाची उणीव भारतीय संघाला जाणवू शकते.
अफगाणिस्तानविरुद्ध भारताचा वनडे संघ:
- शुभमन गिल (कर्णधार),
- रोहित शर्मा,
- श्रेयस अय्यर (उपकर्णधार),
- केएल राहुल,
- ईशान किशन,
- हार्दिक पंड्या,
- नीतीश कुमार रेड्डी,
- वॉशिंग्टन सुंदर,
- कुलदीप यादव,
- अर्शदीप सिंग,
- प्रसिद्ध कृष्णा,
- प्रिन्स यादव,
- गुरनूर बरार
- हर्ष दुबे.
