पुणे : आंतरराष्ट्रीय स्तरावर इबोला विषाणूचा वाढता प्रादुर्भाव लक्षात घेता पुणे आंतरराष्ट्रीय विमानतळ प्रशासनाने विशेष खबरदारीचे उपाय सुरू केले आहेत. परदेशातून येणाऱ्या प्रवाशांमुळे हा घातक संसर्ग शहरात पसरू नये, यासाठी विमानतळावर विशेष आरोग्य तपासणी केली जाणार आहे. प्रशासनाने स्पष्ट केले की, आतापर्यंत पुणे विमानतळावर इबोलाचा एकही संशयित किंवा बाधित रुग्ण आढळलेला नाही. मात्र, प्रतिबंधात्मक उपाय म्हणून विमानतळ प्राधिकरण, विमानतळ आरोग्य संघटना आणि क्विक रिस्पॉन्स टीम यांच्या संयुक्त विद्यमाने विमानतळ परिसरात कडक आरोग्य यंत्रणा कार्यान्वित करण्यात आली आहे. परदेशातून येणाऱ्या प्रवाशांना स्वयंघोषणा अर्जात खरी आणि अचूक माहिती देण्याचे आवाहन करण्यात आले असून, ताप, तीव्र अशक्तपणा, उलट्या, शरीरातून रक्तस्त्राव किंवा आफ्रिकन देशांतील अलीकडील प्रवासाचा इतिहास असल्यास तो लपवू नये, असे सांगण्यात आले आहे.
जागतिक आरोग्य संघटनेने (WHO) इबोलाच्या वाढत्या प्रसाराला ‘आंतरराष्ट्रीय सार्वजनिक आरोग्य आणीबाणी’ घोषित केले आहे. सध्या काँगो आणि युगांडा येथे इबोलाच्या ‘बुंदिबुग्यो स्ट्रेन’मुळे तीव्र रक्तस्रावी तापाची मोठी साथ पसरली आहे. या आजाराचा मृत्यूदर अत्यंत जास्त असून, सध्या कोणत्याही देशाकडे प्रभावी लस किंवा ठोस औषध उपलब्ध नसल्याने प्रतिबंधात्मक उपायांवरच भर दिला जात आहे. काँगोच्या तीन प्रांतांमध्ये आतापर्यंत 867 संशयित रुग्ण आढळले असून 204 जणांचा मृत्यू झाला आहे. २०१४ ते २०१६ दरम्यान पश्चिम आफ्रिकेत झालेल्या भीषण साथी नंतरचा हा दुसरा सर्वात मोठा उद्रेक मानला जात आहे. काँगो आणि युगांडाच्या सीमाभागात परिस्थिती गंभीर बनली असून, दक्षिण सुदानसह शेजारील देशांमध्ये संसर्ग पसरण्याचा धोका वाढला आहे. या पार्श्वभूमीवर भारतासह जगातील प्रमुख विमानतळांवर हाय अलर्ट जारी करण्यात आला आहे. विमानतळ प्रशासनाने परदेशातून येणाऱ्या प्रवाशांना आवाहन केले आहे की, त्यांनी स्वयंघोषणा अर्जात आपली खरी आणि अचूक माहिती भरावी. विशेषतः खालील लक्षणे असल्यास किंवा अलीकडच्या प्रवासाचा इतिहास असल्यास तो लपवू नये:
- तीव्र ताप आणि शरीरात अत्यंत अशक्तपणा जाणवणे.
- उलट्या होणे किंवा शरीराच्या कोणत्याही भागातून अंतर्गत/बाह्य रक्तस्त्राव होणे.
- अलीकडच्या काळात आफ्रिकन देशांमध्ये केलेला प्रवास किंवा तिथल्या लोकांच्या संपर्कात आल्याची माहिती.
