जळगाव : जिल्ह्यात बांगलादेशी घुसखोरांविरोधातील कारवाई अधिक तीव्र करण्यात आली असताना भुसावळ बाजारपेठ पोलीस ठाण्याच्या हद्दीत आणखी एका बांगलादेशी महिलेचा शोध लागल्याने खळबळ उडाली आहे. पोलिसांनी संबंधित महिलेविरुद्ध गुन्हा दाखल केला असून, ती अनेक वर्षांपासून बनावट भारतीय ओळख वापरून वास्तव्यास असल्याचे तपासात उघड झाले आहे. पोलिस तपासात संशयित महिलेचे मूळ नाव फरीदा बेगम मोहम्मद खान (४२) असे असल्याचे निष्पन्न झाले असून ती मूळची बांगलादेशातील पीरोजपूर जिल्ह्यातील भीमकाठी परिसरातील रहिवासी आहे. भारतात आल्यानंतर तिने “जस्मिन बी मोहम्मद खान” या नावाने ओळख निर्माण केली होती. ती भुसावळमधील दीनदयाल नगर भागात सामान्य नागरिकांमध्ये मिसळून राहत होती. गुप्त माहितीच्या आधारे पोलिसांनी तिची चौकशी केली असता सुरुवातीला तिने दिशाभूल करण्याचा प्रयत्न केला; मात्र तांत्रिक आणि दस्तऐवजी पुराव्यांच्या आधारे तिची खरी ओळख उघड झाली.
प्राथमिक चौकशीत संशयित महिलेने २००९ मध्ये एका मध्यस्थाच्या मदतीने बांगलादेशातून बेकायदेशीररीत्या भारतात प्रवेश केल्याची कबुली दिली. नदीमार्गे बोटीने ती प्रथम पश्चिम बंगालमध्ये आली आणि त्यानंतर रेल्वेमार्गे भुसावळ येथे पोहोचली. तपासादरम्यान पोलिसांनी तिच्याकडून जप्त केलेल्या मोबाईलच्या विश्लेषणात बांगलादेशातील +८८० कंट्री कोड असलेल्या क्रमांकांशी सातत्याने संपर्क झाल्याचे आढळले. मोबाईलमध्ये चॅटिंग, व्हिडिओ कॉल आणि जन्म दाखल्याची प्रतही सापडली. पुढील तपासात तिने मृत बहिणीच्या नावावरील कागदपत्रांचा वापर करून रेशन कार्ड, आधार कार्ड, मतदान ओळखपत्र, पॅन कार्ड, बँक पासबुक आणि भारतीय पासपोर्ट तयार केल्याचे उघड झाले आहे. विशेष म्हणजे बनावट पासपोर्टच्या आधारे ती मे २०२३ मध्ये बांगलादेशात जाऊन पुन्हा भारतात परत आल्याचेही समोर आले आहे. त्यामुळे हे प्रकरण केवळ बेकायदेशीर वास्तव्यापुरते मर्यादित नसून बनावट दस्तऐवज आणि आंतरराष्ट्रीय नेटवर्कशी संबंधित मोठ्या रॅकेटकडे तपास यंत्रणांचा संशय वळला आहे.
