पालघर : पालघर माहीम रोडवर असलेल्या अतिक्रमणामुळे मंगळवारी रात्री झालेल्या अपघातात बहिण भावाच्या जागीच मृत्यू झाला. जेवण झाल्यानंतर पालघर येथे आइस्क्रीम खाऊन आपल्या मोटरसायकल वरून घराकडे परत असताना त्यांच्या मोटरसायकल ला ट्रेलरने दिलेल्या जोरदार धडकेत दोघा भावंडांचा जागीच मृत्यू झाला. या अपघातानंतर ट्रेलर चालक पसार झाला आहे. काल रात्री पालघर माहीम मार्गावर ताशी हॉटेलच्या जवळ मूळ उत्तर प्रदेश येथील रहिवासी असलेले मंगेश विश्वकर्मा (२२)आणि पूजा विश्वकर्मा (२५) जेवण झाल्यानंतर आईस्क्रीम खाण्यासाठी दुचाकी वर घराबाहेर पडले होते. आईस्क्रीम खाऊन झाल्यानंतर घरी परतत असताना त्यांच्या दुचाकीला समोरून येणाऱ्या कंटेनर ने धडक दिली. या धडकेत त्या दोन भावंडांचा जागीच मृत्यू झाला. ही धडक इतकी भयानक होती की त्या दोन्ही भावंडाच्या शरीराचे तुकडे रस्त्यालगत इतरत्र पसरले होते.
या अपघातानंतर ट्रेलर चालक घटनास्थळावरून पसार झाला असून त्याच्या शोधासाठी पालघर पोलिसांनी एक टीम गठित केली आहे. या प्रकरणाचा तपास अधिकारी सहाय्यक पोलीस निरीक्षक मल्हार थोरात हे करत आहेत. या प्रकरणी ट्रेलर चालका विरोधात पालघर पोलीस ठाण्यात गुन्हा दाखल करण्यात आला आहे.
