मुंबई : मुंबईपासून थोड्यानंतरवार असलेल्या कर्जत तालुक्यात एक अत्याचाराची घटना समोर आली आहे. कर्जत पोलिस ठाण्याच्या हद्दीत राहणाऱ्या दोन चिमुकल्या मुलींवर स्कूल बसमधल्याच क्लिनरने अत्याचार केला आहे. धक्कादायक गोष्ट म्हणजे त्या पीडित मुली अवघ्या ५ वर्षाच्या आहेत. यामुळे सर्वत्र संतापाचे वातावरण आहे. कर्जत तालुक्यात एका शाळेत विद्यार्थ्यांना घेऊन येणाऱ्या स्कूल बसमधील ही घटना घडली. या प्रकरणी कर्जत पोलीस ठाण्यात गुन्हा दाखल करण्यात आला असून पोलिसांनी आरोपी क्लीनरला अटक केली असून त्याच्याविरोधात पोक्सो अंतर्गत गुन्हा दाखल करण्यात आला आहे. करण दीपक पाटील ( वय २४ ) असे आरोपीचे नाव असून तो कर्जत तालुक्यातील वदप येथील राहणारा आहे.
मिळालेल्या माहितीनुसार, पिडीत मुलींनी आपल्या घरी पालकांना ही माहिती दिली. ही बाब माहिती होताच पालकांनी पोलीस ठाण्यात धाव घेतली. आरोपी करण हा त्यांना बसमधल्या ड्रायव्हरच्या मागच्या सीटवर येऊन बसायला सांगायचा. त्यांना मांडीवर बसवून त्यांच्या शरीराच्या खाजगी भागांना अश्लीलरीत्या स्पर्श करायचा. धक्कादायक गोष्ट म्हणजे त्या मुली सीटवर बसायला गेल्या नाही, तर आरोपी त्यांना मारहाण सुद्धा करायचा. हा सर्व प्रकार गेल्या वर्षभरापासून पीडित मुलींसोबत होत होता, अशी माहिती पालकांनी दिली आहे. पालकांमध्ये भीतीचे वातावरण निर्माण झाले आहे. ‘शाळा व शाळेची बस खरंच सुरक्षित आहे का?’ असा प्रश्न उपस्थित झाला आहे. या प्रकरणात आणखी एक धक्कादायक बाब समोर आली ती म्हणजे आरोपीला वाचवण्यासाठी पीडितांच्या पालकांवर दबाव टाकण्यात आला असा आरोपही मुलीच्या आईनं केला आहे. त्यामुळे संताप अधिक वाढला आहे. याप्रकरणात स्कूलबस मालकाची सुद्धा चौकशी व्हावी, अशी मागणी पालक करत आहेत. तसेच या प्रकरणातील आरोपी करण पाटील यांच्यासह ज्यांचा ज्यांचा या प्रकरणाशी संबध असेल त्यांनाही कठोरात कठोर शिक्षा व्हावी अशी मागणी पीडितांच्या नातेवाईकांनी केली आहे. “अशा नराधमांना कठोर शिक्षा द्या!”, अशी मागणी आता पालक वर्गातून जोर धरू लागली आहे.
