पुणे : राज्याबाहेर आणि राज्यांतर्गत धावणाऱ्या मेल-एक्स्प्रेसचे आरक्षण फुल्ल झाले आहे. त्यामुळे दिवाळीच्या सुट्टीत पर्यटन आणि गावी जाण्याचे बेत आखलेल्या नागरिकांना खासगी ट्रॅव्हल्स आणि विमान प्रवासाकरिता जादा पैसे मोजावे लागणार आहेत. ही दरवाढ येत्या शुक्रवारपासून लागू होत आहेत, तर दुसरीकडे विमानांच्या तिकिटातही भरमसाट वाढ झाली आहे. यंदा दिवाळीच्या सुट्या २८ ऑक्टोबरपासून सुरु होत असल्या तरी चौथा शनिवार-रविवार असल्याने २५ ऑक्टोबरपासूनच गाड्यांना गर्दी होणार आहे. यंदा २९ ऑक्टोबरला धनत्रयोदशी आहे. दिवाळीच्या सुट्टीत विविध पर्यटन ठिकाणी फिरायला जाणाऱ्यांची संख्या मोठी असते. सध्या दिवसाला मुंबईत येताना एक हजार आणि परतीच्या प्रवासासाठी एक हजार अशा एकूण दोन हजार ट्रॅव्हल्स धावतात. दिवाळीच्या सुट्टयांमध्ये ट्रॅव्हल्सची संख्या तीन हजारांवर पोहोचणार आहे.
२५ ऑक्टोबर ते ३ नोव्हेंबर दरम्यान राज्यात पुणे, कोल्हापूर, नागपूर आणि आंतरराज्य मार्गावर गुजरात, राजस्थानला जाणाऱ्या प्रवाशांची गर्दी आहे. मुंबई-अहमदाबाद या मार्गाचे वातानुकूलित स्लीपर बसचे नेहमीचे तिकीट ८०० ते दीड हजार रुपयांपर्यंत आहे. दिवाळीत हेच तिकीट ३ ते ४ हजार रुपयांपर्यंत विकले जात आहे. गेल्या वर्षीच्या तुलनेत यंदा ऑक्टोबर आणि नोव्हेंबरमध्ये सणासाठी दिवाळी आगाऊ फ्लाइट बुकिंगमध्ये ३० ते ३५ टक्क्यांनी वाढ झाली आहे. गोवा आणि जयपूरसारख्या लोकप्रिय पर्यटन स्थळांचे सरासरी विमान भाडे सणासुदीच्या काळात २० ते २५ टक्क्यांनी वाढले आहेत. देशांतर्गत मार्गावर, एकेरी तिकिटांच्या किमतीत लक्षणीय वाढ झाली आहे.
