मुंबई : मुंबई महापालिकेच्या निवडणुकीसाठी गुरुवार १५ जानेवारीला मतदान होणार असून मतदानासाठीचा वेळ विधानसभा निवडणुकीच्या तुलनेत एक तासाने कमी केला आहे. त्यामुळे आश्चर्य व्यक्त होत आहे.
स्थानिक स्वराज्य संस्थांसाठी येत्या १५ जानेवारीला मतदान होणार असून मतदानासाठी सकाळी ७.३० ते संध्याकाळी ५.३० अशी वेळ देण्यात आली आहे. मात्र विधानसभा निवडणुकीसाठी सकाळी ७ ते संध्याकाळी ६ या वेळेत मतदान करण्याची वेळ देण्यात आली होती. विधानसभा निवडणुकीच्या तुलनेत मतदानाचा कालावधी एक तासाने कमी करण्यात आला आहे. याबाबत कर्मचाऱ्यांमध्येही संभ्रम आहे. मात्र निवडणूक आयोगाच्या आदेशानुसार ही वेळ कमी करण्यात आल्याची माहिती पालिकेच्या अधिकाऱ्यांनी दिली. मात्र विधानसभा निवडणुकीच्या तुलनेत मतदान केंद्रांची संख्या वाढवली असून केंद्रांवरील मतदारांची संख्या कमी केली आहे. त्यामुळे वेळ कमी केली असल्याचे राज्य निवडणूक आयोगातील अधिकाऱ्यांनी सांगितले. तसेच आता हिवाळा असून अंधार लवकर पडत असल्यामुळे सायंकाळी ५.३० पर्यंतची वेळ देण्यात आल्याचे त्यांनी सांगितले.
