वृत्तसंस्था : तामिळनाडू विधानसभा निवडणुकीच्या निकालानंतर अभिनेता ते राजकारणी असा प्रवास करणारे विजय आता मुख्यमंत्रीपदाच्या शपथविधीच्या उंबरठ्यावर पोहोचले आहेत. त्यांच्या पक्षाच्या मोठ्या विजयामुळे राज्याच्या राजकारणात नवे समीकरण तयार झाले असून विजय मुख्यमंत्री होणार हे जवळपास निश्चित मानले जात आहे. निवडणुकीनंतर ते सरकार स्थापनेच्या तयारीत व्यस्त असून अधिकाऱ्यांच्या बैठका, राजकीय चर्चा आणि प्रशासनाशी संबंधित कामांमध्ये त्यांचा सहभाग वाढला आहे. मात्र अद्याप त्यांनी मुख्यमंत्रीपदाची अधिकृत शपथ घेतलेली नाही. याच दरम्यान त्यांनी घेतलेल्या एका निर्णयाची राज्यभरात मोठी चर्चा रंगली आहे. शपथविधी होईपर्यंत सरकारकडून देण्यात येणाऱ्या अधिकृत वाहनांचा वापर करणार नसल्याचे त्यांनी स्पष्ट केले आहे. मुख्यमंत्री म्हणून अधिकृत जबाबदारी स्वीकारल्यानंतरच सरकारी सुविधांचा वापर करेन, अशी भूमिका त्यांनी घेतल्याचे सांगितले जात आहे. त्यामुळे सोशल मीडियात विजय यांच्या साधेपणाचे आणि जबाबदारीच्या जाणिवेचे मोठ्या प्रमाणावर कौतुक होत आहे.
दरम्यान, तामिळ चित्रपटसृष्टीतील प्रसिद्ध निर्माता आर. पी. चौधरी यांच्या निधनामुळे चित्रपटविश्वात शोककळा पसरली आहे. विजय यांनी त्यांच्या पार्थिवाचे दर्शन घेत श्रद्धांजली अर्पण केली. ‘पूवे उनक्कागा’ या चित्रपटातून विजय यांना मोठी लोकप्रियता मिळाली होती आणि हा चित्रपट सुपर गुड फिल्म्सच्या बॅनरखाली आर. पी. चौधरी यांनी निर्माण केला होता. याशिवाय ‘लव्ह टुडे’, ‘थुल्लथा मनमुम थुल्लुम’, ‘थिरुपाची’, ‘शाहजहान’ आणि ‘जिल्ला’ यांसारखे अनेक महत्त्वाचे चित्रपट त्यांनी विजय यांच्यासोबत केले होते. हे चित्रपट विजय यांच्या कारकिर्दीतील मैलाचे दगड ठरले. विशेष म्हणजे, आपल्या निर्मिती संस्थेच्या १००व्या चित्रपटात विजय यांनी अभिनय करावा, अशी आर. पी. चौधरी यांची इच्छा होती. मात्र त्यांच्या निधनामुळे ही इच्छा अपूर्णच राहिली.
