मुंबई : टीम इंडियाच्या दिग्गज खेळाडूंना आंतरराष्ट्रीय क्रिकेटमध्ये सूर गवसताना दिसत नाही. त्यामुळे पुन्हा लय मिळवण्यासाठी देशांतर्गत क्रिकेटमध्ये नशिब आजमावत आहेत. मात्र तिथेही त्यांच्या निराशाजनक फॉर्म कायम आहे. सूर्यकुमार यादवच्या बाबतीतही असंच काहीसं झालं आहे. टी २० संघाची धुरा त्याच्या खांद्यावर आहे. मात्र त्याला सूर काही गवसताना दिसत नाही. त्यामुळे त्याला वनडे संघातून वगळण्यात आलं आहे. टेस्टमध्ये त्याची नियुक्ती करणं तर दूरचं गोष्ट राहिली आहे. त्यामुळे देशांतर्गत रणजी ट्रॉफी स्पर्धेत सूर्यकुमार यादव आपल्या फॉर्मसाठी प्रयत्नशील आहे. मात्र येथेही त्याच्या पदरी निराशा पडली. नवख्या गोलंदाजाने त्याला तंबूचा रस्ता दाखवला. रणजी स्पर्धेत मुंबई आणि हरियाणा यांच्यात उपांत्यपूर्व फेरीचा सामना सुरु आहे. सामन्याच्या पहिल्या दिवशी सूर्यकुमार यादव पाच चेंडू खेळून ९ धावांवर बाद झाला.
नवख्या गोलंदाजाने सूर्यकुमार यादवला क्लीन बोल्ड केलं. मुंबईचे आघाडीचे फलंदाज झटपट बाद झाल्यानंतर पाचव्या क्रमांकावर सूर्यकुमार खेळण्यासाठी आला होता. मुंबईचे १४ धावांवर तीन गडी बाद झाले होते. त्यामुळे त्याच्याकडून फार अपेक्षा होत्या. त्याने दोन चौकार मारत मुंबईला सावरण्याचा प्रयत्न सुरु केला. पण सुमित कुमारने षटकाच्या तिसऱ्या चेंडूवरच त्याचा त्रिफळा उडवला. सूर्यकुमार यादवच नाही तर अजिंक्य रहाणे आणि शिवम दुबेही फेल गेला. सुमित कुमार राईट आर्म फास्ट बॉलर आहे. गोलंदाजीसोबत फलंदाजीही करतो. त्याच्या देशांतर्गत खेळ पाहून दिल्ली कॅपिटल्सने त्याच्यावर विश्वास टाकला आहे. आयपीएल २०२४ लिलावात २० लाखांची बेस प्राईस असताना त्याच्यासाठी १ कोटी रुपये मोजले होते. तसेच कोलकात्यानेही त्याला घेण्यासाठी बोली लावली होती. सुमित दिल्लीकडून आयपीएल २०२४ स्पर्धेत चार सामने खेळला. पण तेव्हा त्याला एकही विकेट मिळाला नाही.
