मुंबई: गेल्या काही दिवसांपासून मुंबईतील प्रवाशांच्या आकर्षणाचा विषय ठरत असलेली इलेक्ट्रिक एसी बस लवकरच मुंबई उपनगरातील रस्त्यांवरही धावू लागणार आहेत. बेस्टकडून त्यादृष्टीने तयारी सुरु असून येत्या काही दिवसांमध्ये इलेक्ट्रिक एसी बसची सेवा मुंबई उपनगरात सुरु होईल. सुरुवातीच्या टप्प्यात वांद्रे-कुर्ला संकुल अर्थात बीकेसी आणि सांताक्रुझ येथील प्रवाशांसाठी डबलडेकर एसी बस सुरु करण्यात येईल. येत्या सप्टेंबर-ऑक्टोबर महिन्यात बेस्टच्या ताफ्यात आणखी आठ ते दहा डबलडेकर एसी बसचा समावेश केला जाऊ शकतो. सुरुवातीच्या टप्प्यात या बसेस मोजक्या मार्गांवर सुरु ठेवून त्यांचा प्रतिसाद आजमवण्यात येईल. मुंबईत डबलडेकर इलेक्ट्रिक बसचा पहिला ताफा फेब्रुवारी २०२३ मध्ये प्रवाशांच्या सेवेत रुजू झाला. डबलडेकर एसी बसने पाच किलोमीटरच्या अंतरापर्यंत अवघ्या सहा रुपयांमध्ये प्रवास करता येतो.
डबलडेकर एसी बसची आसन क्षमता ६५ इतकी आहे. ही इलेक्ट्रिक बस एकदा चार्ज केल्यानंतर २५० किलोमीटर अंतर धावू शकते. त्यानंतर या डबलडेकर एसी बसला चार्ज करण्यासाठी साधारण दीड ते तीन तासांचा अवधी लागतो. एका डबलडेकर इलेक्ट्रिक एसी बसची किंमत २ कोटी रुपये इतकी आहे. सध्या बेस्टच्या ताफ्यात एकूण १६ इलेक्ट्रिक डबलडेकर एसी बस आहेत. या सर्व बसेस सध्या फक्त मुंबईत धावतात. मात्र, सप्टेंबर-ऑक्टोबर महिन्यात आणखी ८ नव्या बसेसचा समावेश केल्यानंतर बेस्टच्या ताफ्यातील डबलडेकर एसी बसची संख्या २४ पर्यंत जाईल. स्वीच मोबिलीट या कंपनीकडून बेस्टने डबलडेकर एसी बस ५६ रुपये प्रतिकिलोमीटर या दराने भाडेतत्वावर वापरण्यासाठी घेतल्या आहेत. या बसेस चालवून प्रत्येक किलोमीटरमागे ७५ रुपये मिळवण्याचे बेस्टचे उद्दिष्ट आहे.
सध्या मुंबईच्या रस्त्यांवर धावणाऱ्या इलेक्ट्रिक डबलडेकर एसी बसेस या दक्षिण मुंबईत सेवा पुरवतात. छत्रपती शिवाजी महाराज टर्मिनस, फोर्ट, चर्चगेट, नरिमन पॉईंट आणि कफ परेड अशा भागांमधून एसी डबलडेकर प्रवास करते. आगामी काळात मुंबई उपनगरात ही सेवा सुरु झाल्यास सर्वप्रथम वर्दळीचा परिसर असलेल्या बीकेसीत एसी डबलडेकर बस धावू शकेल. या भागात दररोज ६.५ लाख प्रवासी ये-जा करतात. त्यामुळे याठिकाणी एसी डबलडेकर सुरु केल्यास बेस्टला चांगले उत्पन्न मिळू शकते, असा अंदाज आहे. येथून कुर्ला, बीकेसी आणि वांद्रे स्टेशनपर्यंत बसच्या फेऱ्या चालवल्या जातील. बेस्टकडून येत्या काळात जुन्या बसेस बदलून त्याऐवजी ताफ्यात नव्या एसी डबलडेकर्स समाविष्ट केल्या जाऊ शकतात. सध्या कुर्ला ते सांताक्रुझ या मार्गावर एअर इंडिया कॉलनी, मुंबई विद्यापीठमार्गे प्रवास करणाऱ्या ३११ आणि ३१३ या दोन बसेस आहेत. या दोन बसेस ऐवजी एसी डबलडेकर सुरु करण्याविषयी चाचपणी सुरु आहे. दक्षिण मुंबईत एसी डबलडेकर बसेसला चांगला प्रतिसाद मिळाला आहे. त्यामुळे आम्ही येत्या महिनाभरात बीकेसीत एसी डबलडेकर बससेवा सुरु करु. त्यानंतर सांताक्रुझमध्ये एसी डबलडेकर धावेल, अशी माहिती बेस्टच्या एका अधिकाऱ्याकडून देण्यात आली.
