नाशिक : सणासुदीच्या पार्श्वभूमीवर नागरिकांना सुरक्षित, स्वच्छ आणि दर्जेदार अन्न उपलब्ध करून देण्यासाठी अन्न व औषध प्रशासनाने (FDA) राज्यभर विशेष तपासणी मोहीम सुरू केली असून नाशिक विभागात मोठ्या प्रमाणावर कारवाया करण्यात आल्या आहेत. १८ सप्टेंबर रोजी नाशिकमधील सय्यद पिंपरी येथे असलेल्या छाया ॲग्रो प्रायव्हेट लिमिटेड या कंपनीवर धाड टाकून तब्बल ४८ लाख ८१ हजार रुपयांचा बेरीस्टा (फ्राईड ओनियन) आणि रिफाइंड सनफ्लॉवर ऑईलचा साठा जप्त करण्यात आला. तपासणीदरम्यान १,२०० किलो फ्राईड ओनियन, ज्याची किंमत ४८ लाख ३ हजार २०० रुपये आहे, तसेच ३२८ किलो रिफाइंड सनफ्लॉवर ऑईलचा साठा आढळून आला. अन्न सुरक्षा मानके कायद्यानुसार अस्वच्छ वातावरणात, निकृष्ट दर्जाच्या किंवा असुरक्षित परिस्थितीत अन्नपदार्थांचा साठा केल्याप्रकरणी ही कारवाई करण्यात आली. सणासुदीच्या काळात मिठाई, दुग्धजन्य पदार्थ, खाद्यतेल, मसाले आणि फराळाच्या पदार्थांची मागणी वाढत असल्याने भेसळ रोखण्यासाठी अन्न व औषध प्रशासनाने राज्यभर तपासणी मोहीम अधिक तीव्र केली आहे.
आयुक्त तुकाराम मुंडे आणि सहआयुक्त मंगेश माने यांच्या मार्गदर्शनाखाली सुरू असलेल्या या मोहिमेत अहिल्यानगर जिल्ह्यातील एमआयडीसी परिसरातील अरिहंत कोल्ड स्टोरेजवर कारवाई करून ७५,३५६ किलो पाश्चराईज कुकिंग बटरचा साठा जप्त करण्यात आला असून त्याची किंमत तब्बल ३ कोटी ९५ लाख ६२ हजार रुपये आहे. निफाड तालुक्यातील कोकणगाव येथील आर्या कोल्ड स्टोरेज अँड एक्स्पोर्टर्समधून फ्रोजन कस्टर्ड, ॲपल पल्प, आंबा पल्प आणि क्रीम असा २९ लाख १८ हजार रुपयांचा साठा जप्त करण्यात आला. याशिवाय नाशिकच्या द्वारका परिसरात दोन खासगी बसमधून २,१५५ किलो स्पेशल स्वीट बर्फीचा ५ लाख ५८ हजार रुपयांचा साठा जप्त करण्यात आला. जळगाव, धुळे आणि अहिल्यानगर जिल्ह्यांतही क्रीम, खाद्यतेल, मिठाई, सुपारी, तूप आणि इतर अन्नपदार्थांवर कारवाई करण्यात आली आहे. मागील १५ दिवसांत नाशिक, जळगाव, अहिल्यानगर आणि धुळे या चार जिल्ह्यांमध्ये एकूण ३६ कारवाया करण्यात आल्या असून त्यामध्ये सुमारे ५ कोटी ४० लाख रुपयांचा संशयित अन्नसाठा जप्त करण्यात आला आहे. यामध्ये सर्वाधिक कारवाई अहिल्यानगरमधील कोल्ड स्टोरेजवर करण्यात आली असून जवळपास ४ कोटी रुपयांचे ७५ हजार किलो बटर जप्त करण्यात आले आहे. अन्न सुरक्षा नियमांचे उल्लंघन करणाऱ्या व्यावसायिकांविरोधात पुढील काळातही कठोर कारवाई सुरू राहणार असल्याचे अन्न व औषध प्रशासनाने स्पष्ट केले आहे.
