पुणे : प्रवाशांची फसवणूक रोखण्यासाठी आणि सुरक्षित प्रवास सुनिश्चित करण्यासाठी प्रादेशिक परिवहन कार्यालयाने (आरटीओ) मे महिन्यात विशेष तपासणी मोहीम राबवली. या मोहिमेत एकूण १ हजार ३३६ ऑटोरिक्षा चालकांची तपासणी करण्यात आली. त्यापैकी ४८४ चालक विविध नियमांचे उल्लंघन करताना दोषी आढळले. या चालकांवर दंडात्मक कारवाई करत आरटीओने एकूण १ लाख ६० हजार रुपयांचा दंड वसूल केला आहे. तसेच गंभीर स्वरूपाच्या तक्रारींमुळे ९ रिक्षाचालकांचे परवाने निलंबित करण्यात आले आहेत. प्रवाशांकडून प्राप्त झालेल्या तक्रारींच्या आधारे ही कारवाई करण्यात आली. आरटीओने नागरिकांसाठी ८२७५३३०१०१ हा व्हॉट्सॲप हेल्पलाईन क्रमांक उपलब्ध करून दिला असून, त्यावर भाडे नाकारणे, जादा भाडे आकारणे, क्षमतेपेक्षा अधिक प्रवासी वाहून नेणे, मीटरमध्ये फेरफार करणे आणि प्रवाशांशी उद्धट वर्तन करणे अशा स्वरूपाच्या अनेक तक्रारी प्राप्त झाल्या होत्या. या तक्रारींची गंभीर दखल घेत संबंधित चालकांवर कठोर कारवाई करण्यात आली आहे.
आरटीओ प्रशासनाने प्रवाशांना कोणत्याही प्रकारची फसवणूक झाल्यास तातडीने हेल्पलाईनवर तक्रार नोंदविण्याचे आवाहन केले आहे. उपप्रादेशिक परिवहन अधिकारी स्वप्निल भोसले यांनी सांगितले की, तक्रारीच्या स्वरूपानुसार संबंधित चालकांवर योग्य ती कारवाई केली जाईल. दरम्यान, महसूल वसुलीच्या बाबतीतही पुणे आरटीओने उल्लेखनीय कामगिरी केली आहे. सन २०२५-२६ या आर्थिक वर्षात कार्यालयाने १ हजार ९२२ कोटी रुपयांचा महसूल जमा केला असून राज्य शासनाने दिलेले १ हजार ८९५.१७ कोटी रुपयांचे उद्दिष्ट १०१.४२ टक्के पूर्ण केले आहे. रस्ता सुरक्षा अंमलबजावणी पथकांनी तपासणीदरम्यान दोषी आढळलेल्या १६ हजार ५०१ वाहनांना ई-तपासणी अहवाल जारी केला असून त्यातून २५ कोटी ६८ लाख रुपयांचा महसूल प्राप्त झाला आहे. तसेच कार्यालयामार्फत १ लाख ८६ हजार ८२४ वाहन चालक परवाने आणि ५ हजार ५८४ आंतरराष्ट्रीय वाहन परवाने जारी करण्यात आले आहेत. त्यामुळे महसूल वसुली आणि नियम अंमलबजावणी या दोन्ही आघाड्यांवर पुणे आरटीओने प्रभावी कामगिरी केल्याचे दिसून येत आहे.
