पुणे : पोलीस आयुक्तांकडून अवैध प्रकार अन् अवैध धंद्याना तीव्र विरोध असताना देखील स्थानिक पोलीस छुपा आश्रय देत अवैध धंदे चालविताना दिसून येतात. शहरातील अवैध धंदे हा प्रकार खपवून घेतला जाणार नाही, असा थेट इशारा पोलीस आयुक्त अमितेशकुमार सातत्याने देतात. शिवाय अधिकाऱ्यांना बैठकीत यावरून फैलावर देखील घेतले जाते. जर अवैध धंदा आढळला, तर बदलीला तयार रहा असेही ठणकावून सांगत आयुक्त अशा प्रकारांना पाठबळ देणाऱ्यांना धारेवर धरत असतात. काही अधिकाऱ्यांना अवैध प्रकार आणि कामात चुकराई केल्यामुळे त्यांचा पदभार काढून घेत नियत्रंण कक्षात देखील पाठविले आहे. पोलीस आयुक्तांच्या कडक इशाऱ्यानंतरही शहरात मात्र, अवैध धंदे काही ठिकाणी ‘चोरून’ सुरू आहेत, स्थानिक पोलीस यात आमचा काही संबंध नाही, हे दाखवित असल्याचे दिसत आहे. पण, हद्दीत अवैध धंदा त्यांच्या संमतीशिवाय सुरूच होत नाही, हे सांगायला ब्रम्हदेव लागत नाही. कारण, अवैध धंदा चालवायला कोणाला द्यायचा, त्यापुर्वी तो कोण करत होता, तसेच नवा गडी नको असे अनेक अडथळे पार करून सदर अवैध धंदा सुरू होतो. त्यामुळेच सध्या पुण्यात अवैध धंदे चोरून सुरू आहेत, तर पोलीस आम्हाला याबाबत काही माहिती नाही, अशी भूमिका घेत आहेत.
असाच एका विषयासंदर्भात पोलीस आयुक्तांना एका दक्ष नागरिकाने थेट मॅसेज करून बंटी मिश्रा (वय ३६) याच्या अवैध धंद्याबाबत तक्रार दिली. ही माहिती मिळाल्यानंतर आयुक्तांनी संबंधित पोलीस ठाण्याला कारवाईचे आदेश दिले. पण, स्थानिक पोलिसांनी हद्दीचा मुद्दा पुढे केला. येरवडा पोलीस व विश्रांतवाडी पोलीस ठाण्याच्या बॉर्डरवर हा धंदा चालविला जात होता. आयुक्तांनी लागलीच दुसऱ्या पोलीस ठाण्यालाही याची माहिती दिली. त्यांनीही हद्दीचा मुद्दा पुढे आणला. पण, कडक शिस्तीचे अन् चाणक्य असलेले पोलीस आयुक्त अमितेशकुमार यांनी मनी-ध्यानी नसलेला असा जालीम उपाय काढला, येरवडा अन् विश्रांतवाडी पोलिसांनीच या अवैध धंद्यावर छापा टाकून कारवाई करून बंटी मिश्राला धडा शिकवा व अवैध धंदा उद्धवस्थ करण्याचे आदेश दिले. इतकेच नाही तर दोन्ही पोलीस ठाण्यांनी एकत्रित कारवाई करण्यास सांगितले. पोलीस आयुक्तांच्या या दणक्यानंतर धावपळ करत विश्रांतवाडी व येरवडा पोलिसांनी त्या अवैध धंदयावर धाड टाकत एकत्रित कारवाई केली आणि बंटी मिश्रा याला पकडले. त्याला खाकीचा प्रसाद देत अवैध धंदयाचा पुर्ण सेटअप तोडून टाकला आणि अड्यावर छापा टाकत तेथील खेळींनाही पकडले. या घटनेची पोलीस दलात खमंग चर्चा तर सुरूच आहे. पोलीस आयुक्तांच्या या वेगळ्या रूपाने मात्र सर्वच स्थानिक पोलीस ठाण्यांच्या अधिकारी वर्गाला घाम फुटला आहे.
