मुंबई : मुंबई उत्तर पश्चिम लोकसभा मतदारसंघातून शिवसेना शिंदे गटाचे उमेदवार रवींद्र वायकर यांनी शिवसेना ठाकरे गटाचे अमोल कीर्तिकर यांचा अवघ्या ४८ मतांनी पराभव केला. यानंतर सत्ताधारी आणि विरोधकांमध्ये आरोप प्रत्यारोपाच्या फैरी सुरु झाल्या. वायकरांच्या या विजयावर ठाकरे गटाकडून शंका उपस्थित करण्यात आली. इथे पारदर्शक आणि कायदेशीर वातावरणात मतमोजणी झालेली नाही. त्यामुळे त्यांना लोकसभेत खासदार म्हणून शपथ देऊ नये अशी मागणी मुंबई उत्तर पश्चिम मतदारसंघातुन लोकसभा निवडणूक लढलेले हिंदू समाज पक्षाचे उमेदवार भरत शहांनी लोकसभा सरचिटणीस उत्पलकुमार सिंग यांना नोटीस पाठवली आहे. पाठवलेल्या नोटीसमध्ये नमूद करण्यात आले आहे की, भारतात पहिल्यांदा ईव्हीएम मशीन मतमोजणी बाबत एफआयआर दाखल झाला आहे. त्यामुळे रवींद्र वायकरांनी कलम ९९ नुसार त्यांना खासदारकीची शपथ देणे म्हणजे संविधान प्रक्रिया अपवित्र करण्याची परवानगी देणे ठरेल, असे यामध्ये म्हंटले आहे. नोटीसपत्रामध्ये नमूद करण्यात आले आहे की, अशी मागणी यापूर्वी कोणी केली नसेल. तरीही आपण शपथ देण्यामागे संविधानाचा उद्देश लक्षात घेऊन सकारात्मक कृती म्हणून रवींद्र वायकर यांना खासदारकीची शपथ देऊ नये, असे नोटीसमध्ये म्हटले आहे. उमेदवाराचा नातेवाईक मतमोजणी प्रक्रिया सुरु असलेल्या ठिकाणी मोबाईल फोन घेऊन हजर असतो तो फोन ईव्हीएम मशीनसोबत जोडलेला होता, असा आरोप झाल्यावर पोलिसांनी एफआयआर दाखल केला आणि तपास चौकशी आहे.
ईव्हीएमद्वारे होणाऱ्या मतदान व मतमोजणी प्रक्रियेत ठरवून आणि काही निवडक मतदारसंघात गैरवापर करायचा, त्यासाठी काही सरकारी अधिकाऱ्यांना हाताशी धरायचे आणि भाजपला सोयीचा निकाल येण्याची व्यवस्था करायची, अशी चर्चा अनेकदा होत असतांना यावेळी पहिल्यांदाच अशा संदर्भात एफआयआर दाखल झालेला आहे. त्यामुळे ज्या रवींद्र वायकर यांचे निवडून येणे प्रथमदर्शनीच संशयास्पद आहे, त्यांना खासदारकीची शपथ देऊ नये, असे या नोटीसमध्ये म्हंटले आहे. मुंबई उत्तर-पश्चिम मतदारसंघात नेस्को सेंटर या मतमोजणी केंद्रावरील सिसिटीव्ही फुटेज देण्याचे मुद्दाम टाळण्यात येत आहे. ही वस्तुस्थिती हेच दाखविणारी आहे की सरकारी यंत्रणा सत्य लपविण्यासाठी रवींद्र वायकर यांना एकनाथ शिंदे आणि केंद्र सरकारच्या दबावाखाली मदत करत आहे, असे भरत खिमजी शाह यांनी नमूद केले.
