नवी मुंबई : पितृपक्षाचा काळ सुरू झाल्याने घराघरांत पितरांना नैवेद्य अर्पण करण्याची तयारी सुरू झाली आहे. या काळात विविध प्रकारच्या पारंपरिक भाज्यांचा वापर नैवेद्यासाठी केला जात असल्याने काही विशिष्ट भाज्यांना बाजारात मोठी मागणी निर्माण झाली आहे. मात्र, वाढलेली मागणी आणि घटलेली आवक यामुळे भाजीपाल्याच्या दरात वाढ होण्यास सुरुवात झाली आहे. त्यामुळे पितृपक्षात पितरांना भोजन देणेही महाग झाले आहे. पावसाने लवकर उघडीप दिल्यामुळे काही भागांमध्ये पाण्याची कमतरता जाणवत आहे. त्याचा परिणाम भाजीपाल्याच्या उत्पादनावर होत असून, बाजारातील आवक कमी झाली आहे. दुसरीकडे पितृपक्षामुळे काही भाज्यांची मागणी वाढली आहे. त्यामुळे मागणी आणि पुरवठ्यातील तफावतीमुळे भाज्यांच्या दरात वाढ झाली असून, ग्राहकांच्या खिशावर अतिरिक्त भार पडत आहे.
वाशी येथील घाऊक भाजीपाला बाजारात सध्या दररोज सुमारे ५५० गाड्यांची आवक होत आहे. गाड्यांची संख्या समाधानकारक असली तरी प्रत्येक गाडीत येणाऱ्या भाजीपाल्याचे प्रमाण कमी झाले आहे. पितृपक्षामुळे गवार, घेवडा, शेवगा, भेंडी, तोंडली आणि लाल भोपळा या भाज्यांना विशेष मागणी आहे. मागणीच्या तुलनेत पुरवठा कमी असल्याने या भाज्यांच्या दरात मोठी वाढ झाली आहे. सध्या या भाज्यांचे घाऊक दर साधारण ५० ते ७० रुपये किलो इतके आहेत. मात्र, किरकोळ बाजारात ग्राहकांना याच भाज्यांसाठी १०० ते १२० रुपये किलोपर्यंत पैसे मोजावे लागत आहेत. याशिवाय इतर भाज्यांच्या दरातही मागील १५ दिवसांच्या तुलनेत ३० ते ४० टक्क्यांनी वाढ झाल्याचे व्यापाऱ्यांनी सांगितले आहे. गणेशोत्सवाच्या काळात भाजीपाल्याची आवक चांगली असल्याने दर तुलनेने स्थिर होते. मात्र, गणेशोत्सवानंतर पितृपक्ष सुरू होताच भाज्यांची मागणी वाढली आणि त्याच वेळी काही प्रमाणात आवक कमी झाली. त्यामुळे बाजारात दरवाढीचे चित्र निर्माण झाले आहे. वाशी बाजारात नाशिक, पुणे आणि परिसरातून मोठ्या प्रमाणात भाजीपाला येतो. तसेच गुजरात आणि कर्नाटकातूनही भाजीपाल्याची आवक केली जाते. मात्र, पावसातील बदलामुळे काही भागांतील उत्पादनावर परिणाम झाला आहे. पुढील काही दिवसांत मागणी कायम राहिली आणि आवक वाढली नाही, तर भाज्यांच्या दरात आणखी वाढ होण्याची शक्यता व्यापाऱ्यांनी व्यक्त केली आहे. त्यामुळे पितृपक्षाच्या काळात पारंपरिक नैवेद्यासाठी लागणाऱ्या भाज्यांचा खर्च वाढण्याची शक्यता आहे.
